मिस टुरिजमको तेस्रो संस्करण भदौमा

काठमाडौँ-मिस टुरिजमको तेस्रो संस्करण आगामी भदौ २ गते काठमाडौँमा आयोजना हुने भएको छ । प्वाइन्ट मिडिया प्रालिले आयोजना गर्ने ‘मिस टुरिजम–२०१८’ का लागि आजदेखि देशभर आवेदन खुल्ला गरिएको बिहीबार यहाँ आयोजित पत्रकार सम्मेलनमा जानकारी गराइयो ।

राष्ट्रिय र अन्तर्राष्ट्रिय रुपमा नेपालको पर्यटन प्रवर्धन गर्ने उद्देश्यले आयोजना हुने प्रतियोगिताले पर्यटन क्षेत्रमा युवा र महिला सहभागिता वृद्धि, महिला सशक्तीकरण र नेपाली नारीहरुलाई नयाँ अवसरहरुको सिर्जना गर्ने आयोजकको दाबी छ ।

प्रतियोगिताले नेपालका पर्यटकीय गन्तव्यको प्रवर्धन, आन्तरिक पर्यटकको वृद्धि, पर्यटन क्षेत्रमा नयाँ अवसर सिर्जना गर्ने प्वाइन्ट मिडियाका प्रबन्ध निर्देशक नवीन काफ्लेले बताए । प्रतियोगिताका लागि १८ देखि २५ वर्ष उमेर समूहका अविवाहित नेपाली महिलाले आगामी साउन १२ गतेसम्म आवेदन दिन पाउनेछन् ।

आयोजकका अनुसार आवेदन दिने मिति सकिएपश्चात अडिसनबाट छानिएका प्रतिस्पर्धीमध्येबाट उत्कृष्ट २०, १० र ५ हुँदै अन्तिम प्रतिस्पर्धा गराई मिस टुरिजम–२०१८, मिस टुरिजम फस्ट रनर अप–२०१८, मिस टुरिजम सेकेण्ड रनर अप–२०१८ का साथै अन्य उत्कृष्ट प्रतिस्पर्धीको छनोट गरिने छ ।

मिस टुरिजम–२०१८ लाई नगद रु ५० हजार, मिस टुरिजम फस्ट रनर अप–२०१८ लाई रु ३० हजार र मिस टुरिजम सेकेण्ड रनर अप–२०१८ लाई रु २० हजार प्रदान गरिनेछ । त्यसका साथै विभिन्न संस्था र कम्पनीका ब्राण्ड एम्बेसडर नियुक्त गर्नुका साथै पर्यटन क्षेत्रमा अन्य अवसर प्रदान गरिने प्वाइन्ट मिडियाका प्रबन्ध निर्देशक काफ्लेले बताए ।

पत्रकार सम्मेलनमा नेपाल पर्यटन बोर्डका सञ्चालक समिति सदस्य दिपक महतले वोर्डका विदेशमा हुने ट्राभल फेयरहरुमा मिस टुरिजमका विजेतालाई सहभागी गराउन आवश्यक रहेको बताए ।

नेपाल एशोशियसन अफ टुर्स एण्ड ट्राभल एजेन्ट्स (नाट्टा) का अध्यक्ष सिएन पाण्डेले मिस टुरिजमलाई नयाँ पर्यटन प्रोडक्टको रुपमा विकास गर्न आवश्यक रहेको बताए ।

गाउँ पर्यटन प्रवर्धन मञ्च (भिटोफ नेपाल) का अध्यक्ष कमल सापकोटाले मिस टुरिजम अझ प्रभावकारी र अन्तर्राष्ट्रियस्तरमा लैजान आवश्यक रहेको उल्लेख गरे ।