सरकारको पहिलो एजेन्डा विकास र समृद्धि : प्रधानमन्त्री

प्रधानमन्त्री केपी शर्मा ओली, तस्वीर- एजेन्सी

झापा-प्रधानमन्त्री केपी शर्मा ओलीले अहिलेको सरकारले मुलुकको समग्र क्षेत्रको विकास गरेर समृद्ध नेपाल निर्माण गर्ने बताएका छन् । झापाको दमकस्थित मुख्य बजारमा निर्माण गरिएको ‘नमूना बजार’को बुधबार उद्घाटन गर्दै उनले वर्तमान सरकारको पहिलो एजेन्डा विकास र समृद्धि भएकाले समृद्ध मुलुक निर्माण गर्न सबैलाई आ-आफ्नो ठाउँबाट जुट्नसमेत आग्रह गरे ।

“यो सरकारले अब कृषि, उद्योग, व्यापार, पर्यटनलगायत सबै क्षेत्रको विकास गरी समग्र क्षेत्रबाट मुलुकलाई अब्बल सावित गर्छ”–प्रधानमन्त्री ओलीले भने ।

दमक नगरपालिका–६ मा रु एक करोड ३५ लाखको लागतमा नमूना बजार तयार गरिएको छ । पार्कसहितको नमूना बजारमा पानीको फोहोरा, फूलबारी, आराम चियर, विभिन्न आर्कषक लाईटसमेत जडान गरिएको छ ।

दमक नगरपालिकाको रु एक करोड २० लाख र बाँकी उपभोक्ताको लगानीमा नमूना बजार निर्माण गरिएको दमक नगरपालिका प्रमुख रोमनाथ ओलीले बताए ।

सो अवसरमा नमूना बजारको परिकल्पनाकार दमक नगरपालिकाका निवर्तमान कार्यकारी अधिकृत युवराज दाहाललाई सम्मानसमेत गरिएको थियो ।

नमूना बजारको बीचमा लायन्स क्लब अफ दमक माउण्ट एभरेष्टले पानीको फोहोरा बनाएको हो । लायन्स स्तम्भ र त्यसमाथि भएको सिंहको प्रतीकले यहाँको आकर्षण बढाएको भन्दै प्रधानमन्त्री ओलीले लायन्स क्लबलाई धन्यवाद दिए ।

‘प्रदेशको नाम र राजधानी तोक्न ढिला नगर्नुहोस्’

प्रदेश नं १ को नामाकरण अझै नभएको भन्दै प्रधानमन्त्री ओलीले आश्चर्य व्यक्त गरेका छन् । “सप्तकोसी, सगरमाथा यही प्रदेशमा पर्छ”–प्रधानमन्त्री ओलीले भने, “प्रदेश नं १ को नामाकरण र राजधानी तोक्न अब के ले रोक्यो ?”

प्रदेश १ का आन्तरिक मामिला तथा कानूनमन्त्री हिक्मत कार्कीप्रति लक्षित गर्दै प्रधानमन्त्रीले भने, “सप्तकोसी र सगरमाथा भएको प्रदेशमा नामको अभाव कसरी हुन्छ ?”

विकासका लागि राजधानी नै बन्नुपर्छ भन्ने छैन भन्दै प्रधानमन्त्री ओलीले थपे, “राजधानी तोक्न र प्रदेशको नामाकरण गर्न अब ढिलाई नगर्नुहोस् ।”

प्रतिक्रिया

सम्बन्धित सामाग्री