स्कटल्याण्डका खनालद्वारा एनआरएनए यूके उपाध्यक्षमा उम्मेदवारी दिने घोषणा

लन्डन । स्कटल्याण्डवासी सामाजिक अभियन्ता भोला खनालले एनआरएनए यूकेको आसन्न निर्वाचनमा उपाध्यक्ष पदमा उम्मेदवारी दिने घोषणा गरेका छन् । बिहीबार बिहान फेसबुक लाइभमार्फत उनले आफू उपाध्यक्षको आकांक्षी भएको घोषणा गरे ।

एनआरएनए यूकेमा स्कटल्याण्डको प्रतिनिधित्व गर्दै लामो समयदेखि सल्लाहकारको रुपमा काम गरेका खनालले एनआरएनए यूके तीन राज्य (वेल्स, नर्दन आयरल्याण्ड र स्कटल्याण्ड) लाई बाहिर राखेर लन्डनमा मात्र सिमित भएको दावीसहित संघलाई यो सांघुरो घेराबाट बाहिर ल्याएर सबै राज्यमा बस्ने नेपालीको साझा संस्था बनाउन उपाध्यक्षको उम्मेदवारी दिन लागेको बताए ।

नेपाली नागरिकता मुद्दाको निरन्तरता, भूपू गोर्खा र विद्यार्थीका समस्या समाधान एवं नेपालको आर्थिक समृद्धिमा एनआरएनए यूकेको सहभागिता उनका प्रतिवद्धता 
छन् । स्कटल्याण्डको एडिनबरामा सन् २०१३ देखि नेपलिज कम्युनिटी सेन्टर (हिमालय सेन्टर) बनाउन शुरु गरिएको जनाउंदै खनालले त्यसलाई पूर्णता दिन एनआरएनए यूकेमार्फत पहल गर्ने समेत बताएका छन् ।

करिब डेढ लाख नेपाली बेलायतमा रहेको बताइएपनि एनआरएनए यूकेमा ४ हजार पनि सदस्य नहुंदा यसले थोरै मात्र नेपालीलाई समेटेको स्पष्ट भएको उनको बुझाइ छ ।

नेपाल स्कटल्याण्ड एसोसिएसनका संस्थापक खनाल हिमालयन सेन्टर (नेपलिज कम्युनिटी सेन्टर) का ट्रष्टी र व्यवसायी हुन् ।