लन्डन । बेलायती सांसदहरुको एउटा समूहले अध्यागमनबारे यूकेभरका जनतासंग बहस गर्ने भएको छ । बेलायत इयूबाट औपचारिक रुपमा अलग्गिएपछि कुन रुपमा अगाडि बढ्ने भन्ने सन्दर्भमा जनताको राय लिन त्यस्तो योजना बनाइएको हो ।
एघार सदस्यीय क्रस पार्टी होम अफेयर्स कमिटीले छलफलबाट आएको निचोड अनुरुप सरकारलाई सुझाव सिफारिस गर्ने बीबीसीले जनाएको छ । कमिटीकी अध्यक्ष लेबर सांसद यट्टी कुपरले भनिन्, अध्यागमनबारे यसअघि सधैं चर्को र आक्रोशपूर्ण आवाज सुनियो । जनता कस्तो खालको सुधार चाहन्छन् त्यो बुझ्न देशभर अध्यागमनको सार्थक बहस जरुरी छ । ब्रेक्जिट डिलका लागि अध्यागमन केन्द्रिय मुद्दा हुने कुपरले बताइन् ।
यसअघि कुपरले बीबीसीको ब्रेकफास्ट कार्यक्रममा बेलायती जनता अध्यागमनमा कस्तो सुधार चाहन्छन् त्यो उनीहरुले भन्न चाहेको बताएकी थिइन् । कुपरले सरकारले अध्यागमनबारे जनताले भनेका कुरा नसुन्नु पागलपन भएको पनि उल्लेख गरेकी थिइन् ।
