काठमाडौँ, २२ कात्तिक । अख्तियार दुरुपयोग अनुसन्धान आयोगले केही सञ्चारमाध्यमले आयोगले विभिन्न व्यक्तिलाई कारबाहीको दायरामा ल्याएको भनी प्रकाशन गरेको सूचीप्रति ध्यानाकर्षण भएको जनाएको छ ।
आयोगले आज एक विज्ञप्ति जारी गरी सार्वजनिक पद धारण गरेका जोसुकै व्यक्तिद्वारा गरिएका अख्तियारको दुरुपयोग तथा भ्रष्टाचारजन्य कसुरमाथि छानबिन र अनुसन्धान गर्ने अधिकार आयोगमा रहेको स्पष्ट पारेको छ ।
सोहीबमोजिम आयोगले छानबिन तथा अनुसन्धानसम्बन्धि कार्य गोप्य रहने व्यहोरा जानकारी गराउँदै आयोगले आफ्ना गतिविधि प्रवक्ताद्वारा मात्र सार्वजनिक हुने उल्लेख गरेको छ । आयोग सूत्रको हवाला दिँदै प्रकाशित सूचीप्रति आयोगले त्यसलाई काल्पनिक भन्दै भ्रममा नपर्न आग्रह गरेको छ ।
