नृत्य प्रतियोगिताको नियम सहज बनाइयो, अब एक्लैले भिड्न पाउने

लन्डन । बेलायतमा २७ नोभेम्बरका दिन हुन लागेको नृत्य प्रतियोगिता ‘यूके डान्स अफ’ मा अब एक्लैले पनि प्रतिष्पर्धा गर्न पाउने भएका छन् । आयोजक सपन इन्टरटेन्मेन्ट लिमिटेडले आकांक्षीको आग्रहलाई मध्यनजर 
गर्दै समूहमात्र होइन, अब एकल नाच समेत गर्न सकिने नियम बनाएको हो ।

बेलायतमा रहेका नेपाली युवाहरुको प्रतिभा प्रस्फुटन गर्ने उद्देश्यले गर्न लागिएको उक्त प्रतियोगितामा भाग लिन उमेर पनि घटाइएको छ ।

सपन इन्टरटेन्मेन्ट लिमिटेडका निर्देशक सपनकुमार राईका अनुसार, अब १५ वर्ष माथिकाले यसमा भाग लिन सक्नेछन् । यसअघि १६ वर्ष माथिकाले मात्र भाग पाउने भनिएको थियो । पुरस्कार राशी आकर्षक रहेको यस प्रतियोगिताको दर्ता समयसीमा पनि १० नोभेम्बरसम्म बढाइएको छ भने अडिसन १२ नोभेम्बर बिहान १० देखि ३ बजेसम्म प्रिन्सेस हल अल्डरसटमा गरिने भएको छ । अडिसनमा जुनसुकै गीतमा एउटा नाच देखाउनुपर्नेछ ।

नेपालकी चर्चित कोरियोग्राफर रिनासा बान्तवा राई निर्णायक र इभेन्ट एम्बासडर रहेको उक्त प्रतियोगितामा प्रथम हुनेले १२ सय पाउण्ड, दोश्रो हुनेले ८ सय पाउण्ड र तेश्रो हुनेले ५ सय पाउण्ड पुरस्कार र प्रमाणपत्र पाउने आयोजकले जनाएका छन् । विजेतालाई फिल्म वा म्यूजिक भिडियोमा समेत अवसर दिने आयोजकको योजना छ । प्रतिष्पर्धीले चर्चित कोरियोग्राफर रिनासासंग धेरै डान्स टिप्स र ज्ञान लिन सक्नेछन् ।

सामुयल कोडी स्पोर्टस सेन्टर, फार्नबोरोमा हुने प्रतियोगितामा नेपालका लोकप्रिय नायक नायिका प्रियंका कार्की र दयाहाङ 
राईको समेत प्रस्तुति रहने आयोजकले जनाएका छन् ।

सपन इन्टरटेन्मेन्ट लिमिटेडले सन् २००८ तिर गरेको ट्यालेन्ट हन्ट शो अत्यधिक रुचाइएको थियो । त्यही परिकल्पनालाई अहिले अझ परिस्कृत र परिमार्जित गर्दै प्रतियोगिता गर्न लागिएको हो । नेपाली समुदायका अगुवा सूर्य गुरुङ, कमल गुरुङ, सोलिसिटर राजु थापा, वी पी खनाल, डा. कपिल रिजाल, पुनम गुरुङ, कुसाङ गुरुङ जस्ता व्यक्तित्वको साथले पनि प्रतियोगिता विशेष हुने आशा गरिएको छ ।