तस्विरः रोयटर्स

लन्डन । आफू माथि लगाइएका यातनासम्बन्धि दुई मुद्दामा गत साता सफाइ पाएका कर्णेल कुमार लामाले स्वदेश फर्कन ट्राभल डकुमेन्ट लिएका छन् ।

लामाले लन्डनस्थित नेपाली दूतावासबाट ट्राभल डकुमेन्ट लिएको दूतावास श्रोतले जनाउ दिएको छ । ट्राभल डकुमेन्टका लागि निवेदन दिन लामा आफैं दूतावास गएका थिए । तर, दूतावासले आज उक्त डकुमेन्ट लामाको घर ठेगानामा पोष्ट गरिदिएको हो ।

दूतावास श्रोतले लामाको राहदानी मान्य अवधि सकिइसकेकाले उनी ट्राभल डकुमेन्टमार्फत यात्रा गर्न लागेको जनाएको छ । महासेनानी लामाले नेपाल गएर पुनः सैनिक जागिर शुरु गर्नेछन् ।

तर, उनी कहिले नेपाल जान्छन् भन्ने चाहिं यकिन भइसकेको छैन् ।

दक्षिण सुडानस्थित संयुक्त राष्ट्रसंघको शान्तिस्थापक सेनामा खटिएका बेला छुट्टीमा परिवार भेटन बेलायत आउंदा सन् २०१३, जनवरी ३ मा लामालाई लन्डन मेट्रोपोलिटन प्रहरीले पक्राउ गरेको थियो । त्यसयता चलेको उनको मुद्दामा एक मिलियन पाउण्ड (दश लाख पाउण्ड) खर्च भएको बताइएको छ ।

लामामाथि बेलायती क्रिमिनल जस्टिस एक्ट १९८८, १३४ अन्तर्गत मुद्दा चलाइएको थियो ।