लण्डन । युकेको अक्सफोर्डमा बसोबास गर्दै आएका पशुपतिनगर, इलामका कवि तथा गीतकार मुकेश राई आफ्नो दोस्रो गीति एल्बम प्रकाशनको तयारीमा लागेका छन् ।
‘म खेलेको आँगनको फूल’, ‘ओइली सबै झर्यो होला’, ‘यो मुटुमाझ तिमीलाई राखी’जस्ता गीतबाट श्रोताको प्रशस्त प्रशंसा बटुलेका गीतकार राई चाँडै ‘मनोकाङ्क्षा–२’ लिएर सङ्गीतका पारखीहरुमाझ आउन लागेका हुन् । तीन वर्षअघि बजारमा आएको उनको ‘मनोकाङ्क्षा’ नामक एल्बमले निकै राम्रो चर्चा प्राप्त गरेको थियो ।
दोस्रो एल्बममा अहिलेका जल्दाबल्दा सङ्गीतकारद्वय ताराप्रकाश लिम्बू र हरि लम्सालको सङ्गीतमा राजेश पायल राई, प्रमोद खरेल, ताराप्रकाश लिम्बू, मिलन अमात्य, मेलिना राई, बानिका प्रधान, अमृता लिम्बू र दीपा लामाको स्वर सुन्न पाइने छ ।
‘अनुभूतिका रङ्गहरु’ नामक कविता कृतिका सर्जक राईका गीतहरुमा देशभक्ति, प्रेम, वियोग र परदेश पीडाका सुस्केराहरु मिहिन रुपमा पोखिएका पाइन्छन् । पूर्व ब्रिटिस गोर्खा समेत रहेका उनका फुटकर रुपमा थुप्रै गीतहरु चर्चित गायक/गायिकाको स्वरमा रेकर्ड भइसकेका छन् ।
जानू काम्बाङ लिङ्देन
