लन्डन । बेलायतमा पहिलोपटक आयोजित फिमेल बिकिनी फिटनेश २०१६ प्रतियोगिता जितेपछि बधाइले भ्याइनभ्याइ छ २९ वर्षीया कविता पुनलाई ।
यूके नेपाल फेडेरेसन अफ बडी बिल्डिङ एण्ड फिटनेशले महिलामाझ पहिलोपटक गरेको प्रतियोगितामा विजेता बनेकी थिइन् कविता । ५ फिट ३ इन्च उचाईंकी कविताकोे साइज ६ छ (हेर्नुस् तस्विर) ।
सन् २००८ मा बेलायत आएकी भूपू लाहुरे सुपुत्री कविता स्वीन्डन बस्छिन् । पेशाले नर्स हुन् उनी । ग्रेट वेष्टर्न हस्पिटलमा कार्यरत उनले अक्सफोर्ड ब्रुक्स युनिभर्सिटीबाट बीएससी नर्सिङ गरेकी छिन् । दैनिक १२ घण्टा काम गरेर पनि आफ्नो शरीर फिट राखेकी उनी कसरी भ्याउंछिन् फिटनेशमा समय दिन ? भन्छिन्, ‘समय व्यवस्थापन र इच्छा शक्ति नै मुख्य रहेछ ।’
उनी सातामा ५ दिन जिम गएर अभ्यास गर्छिन् । तीन वर्ष भएछ नियमित जिम शुरु गरेको । ‘मिल प्लानमै बढि ध्यान दिन्छु म’, उनले फिट हुनुको राज सुनाइन्, ‘म दिनमा ६ फरक खाना खान्छु । लामो समय भोक खपेर नबसी भोक लागेपछि खाइ हाल्छु । खासगरि ब्राउन राइस, ग्रील चिकेन ब्रेस्ट, ब्रोकोली, भेजिटेबल, स्वीट पोट्याटो, फ्रोजनभन्दा फ्रेस भेजिटेबल बढि र नुन, चिल्लो पिरो कम खान्छु ।’
स्कुल पढ्दा देखि नै भलिवल, बास्केटबल खेल, रनिङ गर्थिन् उनी ।
फिटनेश कम खर्चिलो छैन् तर भित्री सौन्दर्यमात्र होइन, महिला बाहिरबाट हेर्दा पनि राम्रो देखिनुपर्छ भन्ने मान्यता कविताको छ । शुरु शुरुमा कार्डियोमात्र गर्थिन् उनी, पछि हेभी वेट उचाल्ने र अरु कडा अभ्यास थालिन् । ‘मानिसहरु केटी भएर केटा मान्छे जस्तो बडी बनाउनु हुन्न भन्थे तर त्यस्तो होइन । केटाहरुमा हुने हर्मोन बेग्लै हुने भएकाले महिलाहरुले पनि बराबर एक्सरसाइज गर्नुपर्छ’, उनको सुझाव छ । कविता आफ्नी बहिनी सविता पुनका साथ जिम गएर अभ्यास गर्छिन् । सविताले उक्त फिटनेश प्रतियोगितामा रनरअपको उपाधि जितेकी थिइन् ।
कविताले आगामी दिनमा बेलायतको राष्ट्रिय स्तरको फिटनेश प्रतियोगितामा भाग लिने लक्ष्य रहेको बताइन् ।
‘गर्न मन लाग्दा पनि नेपाली सोसाइटीले के भन्ला भन्ने छ’, उनले भनिन्, ‘केटा केटी समान हुनुपर्छ भन्ने मेरो मान्यता छ ।’
ज्यादै हेक्टिक छ उनको पर्सनल लाइफ । ‘बाहिर डुल्दिन । काम, जिम, परिवारले नै समय बित्छ । साथीहरु हामीलाई भेट्दैनस् भनेर खुब रिसाउंछन्’, उनी वाध्यता सुनाउंछिन् ।
सबै तस्विरहरुः मिलन तमु
कविताकी बहिनी सविता
