मोरङको हसन्दहमा बक्राहा खोला बाँध फुटेर जलमग्न बनेको मोरङको हसन्दह गाउँ । खोला गाउँमा पसेपछी २ सय ५० बढी परिवार बिस्थापित भएका छन् । तस्बिर – सुमन घिमिरे, उर्लाबारी (मोरङ), रासस
पाँचथर, ११ साउन । निरन्तरको वर्षाले सडकमाथिबाट ढुङ्गा र पहिरो झरेपछि मेची राजमार्ग अन्तर्गत फिदिम–राँके सडकखण्डको फिदिम–२ स्थित साम्दिनमा गए रातिदेखि सडक अवरुद्ध भएको छ ।
सडक अवरुद्ध हुँदा अहिले दर्जनौँ सवारी साधन रोकिएका छन् । अहिले सडक खुलाउन नेपाली सेना र सशस्त्र प्रहरी लागिपरेको जिल्ला प्रहरी कार्यालयले जनाएको छ ।
सडकमा रहेको ढुङ्गा पन्छाउन लोडर चाहिने र लोडर ल्याएर ढुङ्गा पन्छाउँदा आज दिनभर बाटो अवरुद्ध हुन सक्ने जिप्रका पाँचथरका प्रहरी नायब उपरीक्षक कृष्णप्रसाद कोइरालाले जानकारी दिनुभयो ।
यस्तै सरदमुकाम फिदिम–१ स्थित शिवालय मन्दिर छेउबाट पहिरो खस्दा कञ्चनजङ्घा एकेडेमी उमावि तथा त्यहाँ रहेका दुई घर जोखिममा परेका छन् ।
यसैबीच स्थानीयवासी टेकनाथ बाँस्कोटाको सेफ्टी ट्यांकी र शौचालय पहिराले बगाएको छ । यस्तै उनको घर र जय नेम्वाङको घर पहिराको उच्च जोखिममा रहेको स्थानीयवासीले बताएका छन् । नेम्वाङका घरमा डेरा गरी बस्ने सन्तकुमार थापाले पालेका दुई खसी पहिराबाट पुरिँदा मरेका छन् ।
सिद्धार्थ राजमार्गको बुटवल–तानसेन, तानसेन–राम्दी क्षेत्र अन्तर्गतको सडक आज बिहानैदेखि अवरुद्ध बन्न पुगेको छ ।
जिल्लाका दोभान गाविस–१ झुम्सा, सिद्धबाबा, चरचरे, केराबारी, राम्दी नजिकै पीपलडाँडा गाविस अन्तर्गत दुई स्थानमा पहिरो खसेको हो । अविरल वर्षाले सडकमाथिबाट खसेको पहिराले राजमार्गका छेउमा रहेका तीन घर समेत पुरिएका छन् । अन्य चार घर अझै जोखिममा छन् । माटो र ढुङ्गासहित पानी बग्न नरोकिँदा यहाँका अझै चार घर खतरामा नै छन् ।
राति गएको पहिराले सडक अवरुद्ध हुँदा स्थानीयवासीलाई बुटवल आवतजावतमा समस्या पैदा भएको छ । दूध, तरकारी लगायत गाउँमा उत्पादित सामान बुटवल लैजाने र बुटवलबाट दैनिक उपभोग्य सामान खरिद गरी ल्याउनेलाई सडक अवरुद्ध हुँदा समस्या पैदा भएको छ ।
बुटवलबाट पाल्पा हुँदै अर्घाखाँची, गुल्मी, बाग्लुङ, स्याङ्जा र पोखरा जाने सवारी साधन चल्न सकेका छैनन् । त्यस्तै पाल्पाका ग्रामीण भेगबाट बुटवल जाने सवारी साधन सडक अवरुद्ध हुँदा यात्रु समस्या परेका छन् ।
पटक पटक पाल्पा–बुटवल सडक अन्तर्गत सिद्धबाबा क्षेत्रमा पहिराले अवरुद्ध गरे पनि यसपालि दोभानको झुम्सा क्षेत्रमा ठूलो पहिराले सडक अवरुद्ध बनाउन पुगेको हो । पहिराले सात घर दलित परिवारलाई घरविहीन बनाएको छ । उनीहरुले अहिले नजिकैको स्थानीयवासीको सहारामा आश्रय लिएको स्थानीयवासी नारायण थापाले बताउनुभयो ।
सडक अवरुद्ध खुलाउन स्थानीय बासिन्दा, नेपाल प्रहरी र सशस्त्र प्रहरी बिहानैदेखि खटिए पनि आज साँझसम्म बाटो खुलाउन समस्या रहेको स्थानीयवासीले बताएका छन् । पहिरो अझै रोकिएको छैन । आज साँझसम्म पनि सडक खुल्ने छाँट नभएको स्थानीय बासिन्दा नारायण थापाले बताउनुभयो ।
ट्राफिक प्रहरी प्रमुख प्रवीण आचार्यका अनुसार सिद्धार्थ राजमार्ग खुलाउन तीन डोजर प्रयोगमा आएको छ । सिद्धबाबा क्षेत्रमा एउटा तथा चरचरे र पीपलडाँडा क्षेत्रमा एउटा डोजरको प्रयोग गरी स्थानीय प्रशासनले सडक खुलाउन पहल गरिरहेको छ ।
बर्दिबास, ११ साउन । झन्डै दुई सातादेखिको वर्षासँगै रातु नदीमा आएको बाढीले महोत्तरी जिल्लाका उर्वर जग्गा कटान गर्नाका साथै बिघौँ बिघा जग्गाको बाली नोक्सान गरेको छ ।
बर्दिबास नगरपालिकाका कृष्णपुर, मनहरिपुर तथा पशुपतिनगर, भङ्गाहा, बिजलपुरा, हतिसर्वा र सिङ्ग्याही सहितका गाविसमा साउने सङ्क्रान्तिका दिनदेखि सुरु भएको सघन वर्षासँगै रातु नदीमा आएको बाढीले सयौँ बिघा उर्वर जग्गा कटानसँगै ५० बिघाभन्दा बढीको बाली नोक्सान गरेको किसानले बताएका छन् ।
खासगरी गत आइतबार रातिदेखि परेको मुसलधारे पानीसँगै आएको बाढीले नदीका दुई किनारमा यसपालि बनाइएको कच्ची बाँध तोडेर जग्गा कटान र बाली नोक्सान गरेको किसानको भनाइ छ । बर्खा सुरु भएपछि गत असार अन्त्यतिर बाँधिएको बाँध आइतबार रातिको बाढीले फुटाउँदा आफ्नो गाविसमा मात्र सय बिघा उर्वर जग्गा कटान भएर बगरमा परिणत भएको पशुपतिनगरका पूर्वअध्यक्ष नथुनी महतोले बताउनुभयो ।
पशुपतिनगर– ४, ६, ७, ८ र ९ का घर घरमा बाढी पसेर उत्पात मच्चाएको पूर्वअध्यक्ष महतोको भनाइ छ । पशुपतिनगरमा १५० बिघाभन्दा बढीमा लगाइएको उखु, तरकारी र बगैँचा समेत बाढीले बगर बनाएको किसानले बताएका छन् ।
त्यसैगरी बिजलपुराको भेडिहारी र जुडीटोल, भङ्गाहाको पलार, टोका र रामनगरसहितका बस्तीमा बाढी पसेको छ । आइतबार रातिको बाढीले आफ्नो गाविसको ५० बिघा जग्गा कटान गरेर ३० बिघाभन्दा बढीको बाली नोक्सान गरेको भङ्गाहा–३ रामनगरका सामाजिक कार्यकर्ता रामईश्वर ठाकुरले बताउनुभयो । आइतबार राति हतिसर्वाका १ र ५ तथा सिङ्ग्याहीका ३, ४, ६ र ९ नं वडामा बाढी घरघरै पसेर ताण्डव मच्चाएको जिविसका पूर्वसदस्य विष्णुनारायण पञ्जियारले बताउनुभयो ।
सिङ्गै हिउँद त्यत्तिकै कटाएर बर्खा लागेपछि बर्दिबास र पशुपतिनगरमा रातु नदीमा बाँधिएको बाँधको माटो खुकुलो भएकाले बाढीले सजिलै भत्काउँदा ठूलो क्षति व्यहोर्नुपरेको यस क्षेत्रका सर्वसाधारणले बताएका छन् ।
बाँध भत्केकाले अब आउने बाढीले बस्तीका घर सजिलै लडाउने स्थिति देखिएको पशुपतिनगर–६ दलित बस्तीका महेश्वर राम बताउनुहुन्छ । प्रजिअ वीरेन्द्रकुमार यादवले बाढी प्रभावित क्षेत्रमा विभिन्न निकायको समन्वयमा बचाउ कार्य तत्काल सुरु गरिने जानकारी दिनुभयो ।
नेपालगन्ज, ११ साउन । बाँके जिल्लाको राप्ती नदीमा पानीको सतह बढेपछि नदी आसपासका गाउँमा बाढी पसेको छ ।
राप्तीको पानीको सतह पाँच मि पुग्यो भने खतरा मानिन्छ । यो समाचार तयार पार्दासम्म नदीको सतह पाँच मि ७० सेमी पुगेको तथा पानीको बहाव अत्यन्त तीव्रताका साथ अघि बढिरहेको जनाइएको छ ।
जिल्लाका होलिया, बेतहनी, गङ्गापुर, मटेहिया, फत्तेपुर गाविसका प्रायःजसो सबै भागमा नदीको पानी पसेको छ । त्यस क्षेत्रका नागरिक सुरक्षित अग्लो स्थानको खोजीमा घर छाडेर हिँडेका छन् । “हामीले सुरक्षित स्थानतर्फ जान त्यस क्षेत्रका नागरिकलाई आग्रह गरेका छौँ । बाढी पूर्वसूचनाको साइरन पनि बजाएका छौँ”—प्रजिअ रविलाल पन्थले बताउनुभयो ।
यसैगरी बाढी प्रभावित क्षेत्रका नागरिकको उद्धारका लागि जिल्ला प्रशासन कार्यालय अन्तर्गत रहेका विभिन्न समूहलाई समेत तयारी अवस्थामा राखिएको छ ।
राजविराज, ११ साउन । तीन दिनदेखि लगातार परेको अविरल वर्षाका कारण सप्तरीको कोइलाडी बर्साइनस्थित जिता खोलामा आएको बाढीले आज एक कर्मचारीलाई बगाएको छ ।
मोरङको विराटनगर उपमहानगरपालिका–१३ जतुवा घर भई हाल हनुमाननगर योगिनीमाई नगरपालिका–८ मा बस्दै आएका सुदीपकुमार यादवलाई बाढीले बेपत्ता बनाएको इलाका प्रहरी कार्यालय हनुमाननगरले जनाएको छ ।
हनुमानगरस्थित फोरवाड संस्थामा कार्यरत २३ वर्षीय यादव उक्त संस्था मार्फत कोइलाडी बर्साइनमा रकम असुल्नका लागि जाने क्रममा जिता खोलाले बगाएको प्रहरी नायब उपरीक्षक दानबहादुर कार्कीले बताउनुभयो ।
