बेइजिङ, १७ असार । चीनमा आएको अविरल वर्षापछि गएको पहिरोमा परी शुक्रबार बिहानमात्र कम्तीमा पनि २० जना पुरिएको समाचार छ ।
शुक्रबार बिहान गएको पहिरोमा परी एक जनाको मृत्यु भएको र अरु २० जना पुरिएर रहेको समाचारमा जनाइएको छ ।
चीनको दक्षिणपश्चिमी प्रान्त गुइजोमा अविरल वर्षापछिको पहिरोमा परी ती व्यक्ति पुरिएका हुन् । पुरिएकामध्ये सात जनालाई भने उद्वार गरिएको छ ।
उद्वार गरिएका सात जनालाई अस्पताल भर्ना गरिएको छ । शुक्रबार बिहानैको सो पहिरोमा परी पुरिएकाको खोजी कार्य जारी नै रहेको भएपनि उनीहरुलाई निकाल्न सकिएको छैन ।
सो क्षेत्रमा अहिले पनि भारी वर्षा भइरहेको छ । भारी वर्षाका कारण उद्वारको काम हुन निकै गाह्रो भएको जनाइएको छ ।
गएका केही दिनयतादेखि चीनका केही प्रान्तमा निरन्तर वर्षा भइरहेको र जसका कारण कैयौँको ज्यान गएको समाचारमा जनाइएको छ ।
उत्तरी भारतमा अविरव वर्षा जारी, नौ जनाको मृत्यु
नयाँ दिल्ली, १७ असार । भारतको उत्तरी राज्य उत्तराखण्डमा जारी रहेको अविरल वर्षाका कारण कम्तीमा पनि नौ जनाको ज्यान गएको समाचार छ ।
गएको २४ घन्टादेखि उत्तरराखण्डमा व्यापक मात्रामा वर्षा भएको र त्यसका कारण बाढी आएको छ । उक्त राज्यको चामोली र दिदीहाटमा आएको बाढीमा परी ती सर्वसाधारण मारिएका हुन् ।
सो राज्यको चमोली र दिदीहाट जिल्लामा यस्तो बाढीको प्रकोप सुरु भएको बताइएको छ । ती जिल्लामा अरु पनि ठूलो सङ्ख्याका व्यक्ति प्रभावित भएका छन् ।
भौतिक सम्पत्तिको पनि क्षति भएको बताइएको छ । कैयौं घर भत्किएका छन् भने सयौंघर डुबानमा परेका छन् ।
अधिकारीहरुका अनुसार उत्तराखण्डमा बाढीको प्रकोप अझै बढ्नसक्ने खतरा रहेको मौसमविद्हरुले जनाएका छन् ।
मौसमविदहरुले आगामी २४ घन्टा नै भारी वर्षा नघट्ने जनाएका छन् । उनीहरुले थप सतर्कता अपनाउन र नागरिक सुरक्षाका मापदण्डहरु अपनाउन सरकारलाई सुझाव पनि दिएका छन् ।
उत्तराखण्डमा भारी वर्षा र पहिरोजस्ता प्राकृतिक प्रकोपहरु सामान्यजस्तो नै भएको छ । वर्षेनी यहाँ वर्षा र बाढीबाट नागरिकको ज्यान जाने गरेको छ ।