नेकपा माओवादी केन्द्रका अध्यक्ष पुष्पकमल दाहाल र नेपालका लागि अष्ट्रेलियाका राजदूत ग्लेन ह्वाइटबीच दाहाल निवास लाजिम्पाटमा मङ्गलबार भेटवार्ता हुँदै । तस्बिर ः अध्यक्ष दाहालको सचिवालय, रासस
काठमाडौँ, १४ असार । नेकपा माओवादी केन्द्रका अध्यक्ष पुष्पकमल दाहाल र नेपालका लागि अष्ट्रेलियाका राजदूत ग्लेन ह्वाइटबीच भेटवार्ता भएको छ ।
दाहाल निवास लाजिम्पाटमा आज भएको भेटवार्तामा उहाँहरुबीच नेपालको पछिल्लो राजनीतिक अवस्था र संविधान कार्यान्वयनका बारे छलफल भएको थियो । शान्ति प्रक्रियाका बाँकी कार्य पूरा गर्न, मधेसी, थारु जनजातिलगायतको माग सम्बोधन गर्न र भूकम्पपछिको पुनःनिर्माण कार्यलाई तीव्रता दिन राष्ट्रिय सहमतिको सरकार गठन आवश्यक रहेको अध्यक्ष दाहालले बताउनुभएको थियो ।
भेटका क्रममा अष्ट्रेलियाली राजदूतले अष्ट्रेलिया भ्रमण स्थगन गर्नुभएको विषयमा चासो राख्दै सञ्चारमाध्यममा आए जस्तो स्थिति नभएको तथ्य अवगत गराउनुभएको थियो । उहाँले आफू नियमित रुपमा सरकार, प्रहरी प्रशासन र महान्यायाधिवक्ताको सम्पर्कमा रहेको र त्यस क्रममा कुनै समस्या रहेको नपाएको तथ्य राजदूत ह्वाइटले जानकारी गराउनुभएको थियो ।
आफू मुलुकको राजनीतिक अवस्था र पार्टी कामकै कारण तत्काल अष्ट्रेलिया भ्रमणमा जान नसकेको प्रस्ट पार्दै अध्यक्ष दाहालले उचित समयमा भ्रमण तय गरिने बताउनुभयो ।
सो अवसरमा अध्यक्ष दाहालले नेपालको राजनीतिक विकास प्रक्रिया सहज रुपमा अगाडि बढाउन आफू प्रयासरत रहेको बताउनुभएको उहाँको सचिवालयले जनाएको छ ।
अध्यक्ष दाहालले भूकम्पपछिको पुनःनिर्माणमा अष्ट्रेलिया सरकारले पुरयाइआएको सहयोगप्रति धन्यवाद पनि दिनुभएको थियो ।
