युरोपेली युनियनबाट छुट्टियो यूके

प्रधानमन्त्री क्यामरुन मत दिएपछि केन्द्रमा आफ्नी जीवनसंगिनी समान्थाका साथ । तस्विरः एपी

लन्डन । बेलायतमा बिहीबार सम्पन्न ऐतिहासिक जनमत संग्रहपछि बेलायत अन्ततः युरोपेली युनियन (ईयू) बाट छुट्टिएको छ । बेलायत ईयू सदस्यका रुपमा रहने वा निस्कने भन्ने विषयमा भएको जनमत संग्रहमा रहनुहुन्न भन्ने पक्षमा ५२ प्रतिशत र रहनुपर्ने पक्षमा ४८ प्रतिशत मत पर्यो । नतिजा अनुसार, इंग्ल्यान्ड र वेल्सका जनताले बाहिरिनुपर्ने र लन्डन, स्कटल्याण्ड र नर्दन आयरल्याण्डका जनताले रहनुपर्ने पक्षमा मत दिए । ६० प्रतिशत लन्डनवासी र ६२ प्रतिशत स्कटिसले रहनुपर्ने पक्षमा मतदान गरेपनि बेलायत छुट्टिएको छ ।

नतिजासंगै बेलायती प्रधानमन्त्री डेभिड क्यामरुनलाई राजिनामा दिन दवाव बढेको छ । बीस वर्षदेखि बेलायत ईयूबाट निस्कनुपर्ने पक्षमा वकालत  गर्दै आएका यूकिप पार्टीका नेता नाइजेल फराजले यसलाई स्वतन्त्रता दिवसका रुपमा चित्रित गरेका छन् । उनले प्रधानमन्त्री डेभिड क्यामरुनको राजिनामा समेत मागेका छन् । क्यामरुनले अहिले बिहान केही बेरमा राष्टका नाममा सम्वोधन गर्ने कार्यक्रम छ ।
बेलायती प्रधानमन्त्री क्यामरुन, विपक्षी दलका नेता जेरेमी कोरबीनले रहनुपर्ने पक्षमा सशक्त वकालत गर्दै आएका थिए भने फराज, पूर्व मेयर बोरिस जोन्सन, माइकल गोभ लगायतले निस्कनुपर्नेमा । क्यामरुनले बेलायत युरोपेली युनियनमा बस्दा नै बढी सुरक्षित हुने र आर्थिक अवस्था पनि राम्रो हुने बताउंदै आएका थिए । अब यूकेको आर्थिक भविष्य के हुने भन्ने चिन्ता सर्वत्र छाएको छ ।

जनमत संग्रहमा ४ करोड ६५ लाख नागरिक मतदानका लागि योग्य भएपनि ७२.२ प्रतिशत मत खसेको थियो ।