क्यान्सर पीडित बालकलाई बेलायतबाट सहयोग

लन्डन । क्यान्सर पीडित गुल्मीका एक बालकलाई बेलायतवासी गुल्मेलीले आर्थिक सहयोग गरेका छन् । गुल्मी मजुवाका क्यान्सर पीडित अढाई बर्षीय बालक अनमोल थापाको उपचारार्थ बेलायतबाट दुई लाख रुपैयां बढिको आर्थिक सहयोग पठाइएको हो । बेलायतमा संकलित २ लाख १२ हजार २ सय रुपैयां बुधबार पीडित बालकको परिवारलाई बुधबार हस्तान्तरण गरिएको छ । लन्डन बस्दै आएका मजुवाका उमेश अर्यालको संयोजनमा सो सहयोग रकम संकलन भएको थियो ।

अनमोलको काठमाडौंस्थित कान्ति बाल अस्पतालमा उपचार भइरहेको छ । बुधबार दिउंसो मजुवास्थित टिकाराम मानका बहुमुखी क्याम्पसकी पूर्व उपप्राध्यापक शिखा अर्यालले सहयोग रकम अस्पताल गएर उनका पिता रामु थापालाई हस्तान्तरण गरिन् ।
रक्त क्यान्सर पीडित अनमोलको उपचारका लागि आवश्यक ठूलो रकम जुटाउन थापा परिवारको उपाय नलागेपछि उनीहरुले सहयोग याचना गरेका थिए ।
अनमोलको उपचारमा सघाउने उद्देश्यले जापान, अष्ट्रेलिया लगायतका देशबाट पनि सहयोग संकलन जारी छ । तर आवश्यक रकम अझै जुट्न बांकी रहेकाले सहयोगका लागि परिवारले सबैमा अपिल गरेको छ ।