लन्डन । लर्डसमा हुने एमसीसी (मार्लेबोन क्रिकेट क्लव) र नेपाली क्रिकेट टिमबीचको मैत्रीपूर्ण खेल सफल बनाउन बेलायतस्थित नेपाली युवा समेत जुटेका छन् । ओजेश सिंह नेतृत्वको एक युवा समूहले जुलाई १९ मा हुने उक्त ऐतिहासिक खेल सफल बनाउन साथ दिएको हो । गत साता नेपलिज तन्दूरीमा बसेको लेक्स, प्रशान्त, प्रदीप, सुकृति, आस्था, यादव, ओजेश, श्रेया, समिर र गणेश सहभागी बैठकले दूतावाससहित मुख्य आयोजक तयारी समितिलाई साथ दिंदै सम्भव भएसम्मका उपाय अवलम्वन गर्ने भएको छ । करिब दश हजार दर्शक उतार्नुपर्ने चुनौतीबीच बेलायतको हरेक वर्ग खेल सफल बनाउन लागिरहेको छ ।
बेलायत नेपाल कुटनीतिक सम्बन्ध स्थापनाको दुई सय वर्ष पुगेको उपलक्ष्यमा पहिलोपटक लर्डस् ग्राउण्डमा नेपाली टिमले खेल्ने निश्चित भएपछि यसलाई सर्वत्र चासोका साथ हेरिएको छ । यस्तो ऐतिहासिक खेलमा सहभागिता जनाउन दूतावासले सबैसंग आग्रह गरेको छ ।
यसैबीच, खेलको हालसम्मका तयारी र अन्य सल्लाह सुझाव लिन आज बुधबार अपरान्ह ४ बजे लन्डनस्थित नेपाली दूतावासमा बैठक डाकिएको छ । बैठकमा बेलायतस्थित नेपाली संघसंस्थाका प्रतिनिधि र आयोजक समितिका सदस्यहरु सहभागी हुने अपेक्षा छ ।
यतिखेर टिकट विक्री र ब्यानर, लिफलेट तयार गरि प्रचार प्रसारलाई तीव्र बनाइएको छ । विशेष गरि दीपक श्रेष्ठ, गणेश खड्का, एभरेष्ट गौतम, कृष्ण शर्मा, राजन खकुरेल लगायतले दौडधुप गरिरहेका छन् । यसै सातामात्र करिब ७ सय टिकेट विक्री भइसकेको राजन खकुरेलले जानकारी दिए ।
क्याप्टेन पारस खड्काले खेल प्रवर्धन हुने खालको एकहजार टिसर्ट छपाउन अर्डर दिइसकेका र ति टिसर्ट च्यारिटीका लागि सुपथ मुल्यमा विक्री गरिने जनाइएको छ ।
खेल हेर्न लिभरपुल नेपाली कम्युनिटी र स्कटल्याण्डको नेपाली समुदाय कोचबाटै आउने निश्चित भएको छ । नेपाल पर्यटन बोर्डका यूके प्रतिनिधि पशुपति भण्डारीको पहलमा ब्ल्याकहिथ र आसफोर्ड केन्टबाट समेत कोचमा दर्शक उतारिनेछ ।
नेपाली दूतावासको प्रत्यक्ष संलग्नतामा गैर आवासीय नेपाली संघ बेलायत, नेपाल पर्यटन बोर्ड यूके लगायत नेपाली संघसंस्थाले यसमा साथ दिएका छन् ।
प्रवेश शुल्क जम्मा दश पाउण्ड र शुल्कबाट संकलित रकमको केही हिस्सा नेपालको पुनर्निर्माणमा जाने भएकाले सबै बेलायतवासी नेपालीलाई सहभागी भइदिन आयोजकको अपिल छ ।
६५ वर्ष माथिकालाई ५ पाउण्ड र १६ वर्ष मुनीकालाई निशुल्क हुने उक्त खेलको टिकेट अनलाइन वा खेल हुने दिन ढोकैमा किन्न सकिनेछ ।
