शुक्रबार, कार्तिक १४ २०७७ | Fri, October 30, 2020
नेपालको समय: ०९:५९ | UK Time: 04:14

गरिब मुलुकहरुको विकासमा विशेष ध्यान दिन आग्रह

वीनेपाली
२०७३ जेठ १७ गते १४:०७
एलडिसी वाचका अन्तर्राष्ट्रिय संयोजक गौरी प्रधान संयुक्त राष्ट्रसंघका उपमहासचिव ज्ञानचन्द्र आचार्यलाई घोषणापत्र हस्तान्तरण गर्दै

एलडिसी वाचका अन्तर्राष्ट्रिय संयोजक गौरी प्रधान संयुक्त राष्ट्रसंघका उपमहासचिव ज्ञानचन्द्र आचार्यलाई घोषणापत्र हस्तान्तरण गर्दै

लन्डन । अति कम विकसित ४८ मुलुकका नागरिक समाजका प्रतिनिधिहरुले धनी मुलुक तथा अन्तर्राष्ट्रिय विकास एजेन्सीहरुलाई गरिब मुलुकको विकासमा विशेष ध्यान दिन आग्रह गरेका छन् ।
टर्कीको अन्तल्यमा शनिबार सम्पन्न दुई दिने अन्तर्राष्ट्रिय बैठकले १९ बुंदे घोषणापत्र जारी गर्दै उक्त आग्रह गरेको हो ।
बैठकले आन्तरिक द्वन्द्व, प्राकृतिक विपत्ति, आर्थिक संकट आदिले राजनीतिक संक्रमण झेलिरहेका अति कम विकसित मुलुकहरुको शान्ति, समृद्धि र समानतामुलक समाज निर्माणका लागि विशेष ध्यान दिन आग्रह गरेको छ ।

काठमाडौंमा मुख्यालय रहेको एलडिसी वाचले आयोजना गरेको उक्त बैठकमा दर्जनौं गैर सरकारी संस्थाका सयौं प्रतिनिधिले भाग लिएका थिए । बैठकमा नेपाल, बंगलादेश, बेनिन, क्याम्बोडिया, किरिबाटी, सेनेगल तथा टोगो लगायत दक्षिणी तथा पूर्वी अफ्रिका एवं दक्षिण एसियाली नागरिक सन्जालका प्रतिनिधिहरुको सहभागिता थियो ।
बैठकले विश्वका अति गरिब मुलुकहरुको दीगो विकासका लागि समयसीमाभित्र विशेष र परिणाममुखी निर्देशिका बमोजिम काम गर्न आग्रह गरेको छ । बैठकले स्वतन्त्र व्यापार, ऋण मिनाहा, लैंगिक न्याय र महिला अधिकार आदिमा समेत जोड दिएको छ ।

एलडिसी वाचका अन्तर्राष्ट्रिय संयोजक गौरी प्रधानले सम्मेलन समापनपछि संयुक्त राष्ट्रसंघका उपमहासचिव ज्ञानचन्द्र आचार्यलाई जारी घोषणापत्र हस्तान्तरण गरेका थिए । प्रधानले बैठकको घोषणापत्र बमोजिम यसमा भएका प्रगतिबारे नियमित अनुगमन गरिने समेत जनाए ।

प्रतिक्रिया

सम्बन्धित सामाग्री

फेसबुक