नायिका प्रियंका, तस्विरः सुरज पौडेल

लन्डन । आगामी २१ अगष्ट अल्डरसटमा हुन गइरहेको पांचौं मिस यूके नेपाल २०१६ का प्रतिष्पर्धीलाई नायिका प्रियंका कार्कीले प्रशिक्षण दिने भएकी छिन् । मिस यूके नेपाल आयोजना गर्ने इभेन्ट्स एण्ड आइडियाजकी निर्देशक शान्ति गुरुङले प्रियंका अगष्ट पहिलो साता बेलायत आउने जानकारी दिइन् ।

यस वर्ष मिस यूके नेपालमा ९ जना सुन्दरीले प्रतिष्पर्धा गर्ने भएका छन् । दुई पटक भएको अडिसनबाट ति छनोट भएका हुन् । प्रतिष्पर्धीहरुमा अलिसा गौचन, सुसन राई, टेनिसा राना, आरती गुरुङ, प्रशंसा लिम्बु, मनिषा आचार्य, विभिया श्रेष्ठ, कल्पना निउरे र मलिसा गुरुङ छन् ।

अल्डरसटको एम्पायर ब्यांक्यूटिङ हलमा हुने फिनालेमा सहभागिताका लागि बेलायतवासी समस्त नेपालीमा आग्रह गर्दै निर्देशक शान्ति गुरुङले त्यस कार्यक्रम प्रायोजन गरिदिन व्यापारिक संस्थाहरुलाई अनुरोध समेत गरेकी छिन् ।

सन् २०१० देखि शुरु मिस यूके नेपाल प्रतियोगिताले क्रमशः नवीना गुरुङ, गौमाया गुरुङ, दुर्गा गुरुङ र निया देवानलाई मिस यूके नेपालको उपाधि दिलाइसकेको छ ।

तर, प्रतिष्पर्धी अभावका कारण सन् २०१३ र २०१५ मा प्रतियोगिता स्थगित गर्नुपरेको थियो ।

यसैबीच, पहिलो पटक यस वर्ष गर्न लागिएको मिसेस यूके नेपाल भने नहुने भएको छ । पर्याप्त सहभागी अभावले उक्त प्रतियोगिता नगर्ने निर्णय भएको शान्तिले जनाइन् ।