लन्डन । रोयल बरो अफ ग्रीनवीच काउन्सिलले नेपाली समुदायलाई विशेष प्राथमिकतामा राख्दै ‘नेपाल’ लाई अब विद्यालय तथा सरकारी फाराममा उल्लेख गर्ने भएको छ ।
रोयल बरो अफ ग्रीनवीच नेपलिज सोसाइटीका पदाधिकारीहरुसंग सोमबार भएको विशेष छलफलपछि काउन्सिलले सरकारी फारामको ‘इक्वालिटी एण्ड डाइभर्सिटी’ सेक्सन अन्तर्गत इथ्नीक ब्याकग्राउण्डमा ‘एसियन नेपाली’ समावेश गर्ने भएको हो । यसअघि एसियन इन्डियन, एसियन बंगलादेशी, एसियन पाकिस्तानी र एसिअन अदर्समा नेपाली भर्नु पर्दथ्यो ।
काउन्सिलको चियर अफ क्याबिनेट काउन्सिलर डेनिस हाइल्याण्डसहित काउन्सिल हेड अफ एक्जुकेटिभ, काउन्सिल लिडर, काउन्सिलरहरु र सोसाइटीका तर्फबाट अध्यक्ष कुमार श्रेष्ठ, एलएन पाण्डे, मोहन गुरुङ, देवेन्द्र श्रेष्ठ, अर्क तिमिल्सिना बैठकमा सहभागी थिए ।
ग्रीनवीच बरोमा अंग्रेजी पछि धेरै बोलिने भाषा नेपाली रहेको बताउंदै सोसाइटीले नेपाली समुदायलाई विशेष प्राथमिकतामा राख्न आग्रह गर्दै आएको थियो । सोसाइटी अध्यक्ष श्रेष्ठले अब काउन्सिलले नेपाली समुदायलाई ‘रिकग्नाइज’ गरेको बताए ।
बैठकमा सहभागी सोसाइटीका प्रमुख सल्लाहकार एलएन पाण्डेले छलफल पछि काउन्सिलले सोसाइटीलाई टाउन हलमै एक वर्षसम्म निशुल्क बैठक बस्न ठाउं उपलव्ध गराउने र बरोमा रहेका नेपालीको तथ्यांक एवं सर्वेक्षण गर्न सोसाइटीलाई काउन्सिलले सहयोग गर्ने निर्णय गरेको वीनेपालीलाई जानकारी दिए ।
