लन्डन । तमु चलचित्र ‘फ्रेसी’ को प्रिमियर शो भएको छ । अल्डरसटस्थित किङस् सेन्टर हलमा आइतबार करिब ५ सय तमु चलचित्र प्रेमीहरूको उपस्थितिमा शो भएको हो ।
शोमा प्रमुख अतिथी थिए तमु धिं यूके अध्यक्ष रामचन्द्र गुरुङ (सुर्जे) र तमु प्हे ल्हु संघ यूके अध्यक्ष सोम तोर्जे गुरुङ । सो अवसरमा प्रमुख अतिथिहरूले फ्रेसी फिल्म निर्माता मिनप्रसाद गुरुङ, श्रीमती दिलु गुरुङ र श्रीमती यशोधा गुरुङलाई खादा ओढाएर सम्मान गरेका थिए भने फ्रेसी फिल्म युनिटका तर्फ बाट प्रमुख अतिथिहरूलाई खादा र मायाको चिनो प्रदान गरिएको थियो ।
उक्त कार्यक्रमलाई पिपल मोर्गेज लिमिटेडका म्यानेजिङ डाइरेक्टर सूर्य गुरुङ ले प्रायोजन गरेका थिए । सूर्य गुरुङले सञ्चालन गरेको कार्यक्रममा निर्माता मिन प्रसाद गुरुङले स्वागत मन्तब्य दिएका थिए ।
कास्की जिल्लाको सिक्लेस गाउंमा केन्द्रित फिल्मले पर्यटन विकास र हस्तकला सिपको प्रवर्धन गर्ने उद्देश्य राखेको फिल्म निर्माण पक्षले जनाएको छ । उक्त चलचित्रमा स्थानीय कलाकारहरूको बेजोड अभिनय छ । लोटस फिल्म प्रालिको ब्यानरमा बनेको फ्रेसीमा नव नायक प्रतिक गुरुङ र धन माया गुरुङ नायिका छन् भने निर्देशन युग गुरुङले गरेका छन् ।
