लन्डन । आयरल्याण्डले भूकम्पपछि नेपाल भ्रमणमा आफ्ना नागरिकलाई सावधानी अपनाउन यसअघि जारी गरेको सूचना हटाएको छ । आयरल्याण्डका लागि समेत कार्यवहाक राजदूत रहेका तेजबहादुर क्षेत्रीले केही साताअघि आइरिस अधिकारीहरुसंग भेटेर भ्रमणमा सावधानी अपनाउन जारी सूचना हटाइदिन आग्रह गरेका थिए । यस्तो सावधानी गरिएको सूचना हुंदा आइरिस नागरिक विगत जस्तो नेपाल भ्रमणमा उत्साहित थिएनन् ।
क्षेत्रीले विनाशकारी भूकम्पको वर्ष दिनको सम्झनामा आयरल्याण्डमा नेपाल सम्मेलन हुनु अघि यहांको विदेश मन्त्रालयका एसिया प्यासिफिक उप निर्देशक ब्रायन ओ ब्राइन र डेस्क अफिसर मारिया सिहीसंगको भेटमा भ्रमण प्रतिवन्ध खुकुलो पार्न, आयरल्याण्डको ओभरसिज डेभलपमेन्ट असिस्टेन्स (ओडिपी) को प्राथमिकता मुलुकमा राख्न, सर्वदलीय संसदीय समिति र परामर्श संयन्त्र गठन गर्न आग्रह गरेका थिए ।
लन्डनस्थित नेपाली दूतावासले विदेश मन्त्रालयका एसिया प्यासिफिक उप निर्देशक ब्रायन ओ ब्राइनलाई उधृत गर्दै शुक्रबार आइरिस सरकारबाट नेपाल भ्रमणमा लगाइएको सबै प्रतिवन्ध हटाइएको जनाएको छ । यसपछि आइरिस पर्यटक नेपाल घुम्ने क्रम वृद्धि हुने दूतावासको विश्वास छ ।
यसअघि लन्डनस्थित नेपाली दूतावास, नेपाल आयरल्याण्ड सोसाइटी, एक्सन एड र इन्जिनियर्स वीदाउट बोर्डर्स आयरल्याण्डको संयुक्त आयोजनामा ३० अप्रिल शनिबार डब्लिनमा नेपाल सम्मेलन भएको थियो । भूकम्पपछि पुनर्निर्माण, संयुक्त योजना सञ्चालन र सञ्जाल विस्तारमा केन्द्रित गरिएको उक्त सम्मेलनले नेपालको पर्यटन प्रवर्धनमा समेत सघाउने अपेक्षा गरिएको छ ।
