लन्डन । सन् २०१२ मा मिस नेपाल भएपछि त्यसयता यूके फर्किनन् सृष्टि श्रेष्ठ । कारण उनलाई स्वदेशमै केही गर्ने सोच थियो । मोडलिङ, म्यूजिक भिडियो, सिनेमा अनि समाजसेवाले व्यस्त सृष्टि पछिल्लो समय रंगमञ्चमा पनि झुल्किइन् ।
अहिले पूर्व मिस नेपाल सृष्टि सिनेमा र रंगमञ्चमा एकसाथ रमाइरहेकी छिन् । यी सुपर मोडल अभिनित विलियम सेक्सपियरको ‘ह्याम्लेट’ लाजिम्पाटस्थित थिएटर भिलेजमा मञ्चन भइरहेको छ ।
बेलायत नेपाल कुटनीतिक सम्वन्धको दुई सय वर्षका अवसरमा बेलायती र नेपाली नाट्यकर्मीले मञ्चन व्यवस्था मिलाएका हुन् । ह्याम्लेटलाई नेपाली भाषामा ग्रेगरी थम्सन र विमल सुवेदीले संयुक्त रूपमा निर्देशन गरेका हुन् ।
यही नाटक बेलायतमा समेत मञ्चन हुंदैछ आगामी मे २७ र २८ मा । ब्रिटिश काउन्सिलको सहयोगमा साउथ बैंक सेन्टरले नाटक मञ्चन गर्न लागेको हो । रोयल फेस्टिबल हलमा नाटक देखाइंदैछ ।
यिनै सुन्दरी बेलायत आउने भएकी छिन् आफ्नो पहिलो फिल्म ‘गाजलु’ को प्रिमियर शोका लागि समेत । २९ मेका दिन इम्पायर ब्याङक्यूटिङ हल अल्डरसटमा ‘गाजलु’ को वर्ल्ड प्रिमियर हुंदैछ । इन्टेक १९८५ नामक संस्थाले १० र १ बजे गरि दुई प्रिमियर शो गर्न लागेको हो । हेमराज बिसी निर्देशित उक्त फिल्ममा सृष्टि, अनमोल केसी, गौरब पहारी, सलोन बस्नेत, मेनुका प्रधान, गौरी मल्ल, कृष्ण मल्ल, विश्व बस्नेत, ऋतिक शाही, आदिले अभिनय गरेका छन् । श्रृष्टिको पहिलो फिल्म भएकाले पनि उनी यसबाट बढि आशावादी छन् । फिल्मको निर्माण रोहित अधिकारी र हेमराज बिसीले गरेका हुन् ।
श्रृष्टिका बाबु आमा बेलायतका स्थायी बासिन्दा हुन् । ‘मिस नेपाल हुन गएकी छोरी नायिकाको रुपमा फेरि आउंदा हामी परिवारलाई त गौरव लाग्छ नि’, फालमाउथबाट उनका बुबा इश्वर श्रेष्ठले भने । श्रृष्टि मिस वर्ल्डमा टप २० सम्म पुग्न सफल भएकी थिइन् ।
