शुक्रबार, कार्तिक १४ २०७७ | Fri, October 30, 2020
नेपालको समय: २२:०९ | UK Time: 16:24

भुवन केसीका छोरा अनमोल भन्छन्–गौरी मल्लसित काम गर्न मन लागेकाे छ

वीनेपाली
२०७३ वैशाख २५ गते १७:५२

bhuwan kc

लण्डन । सदाबहार नेपाली नायक भुवन केसी र उनका पुत्र अनमोल केसी ‘ड्रिम्स’ को प्रदर्शनका लागि यूके आइपुगेका छन् ।
आइतबारबाट युकेको विभिन्न स्थानमा प्रदर्शन हुँदै गरेको सो चलचित्रको प्रोमोसनका लागि उनीहरु शनिबार यूके आइपुगे । उनीहरुलाई चलचित्रका निर्माता डा. कपिल रिजाल र यूकेमा प्रदर्शनको आयोजक सपन इन्टरटेनमेण्टका निर्देशक सपनकुमार राईले स्वागत गरे । त्यसपछि सोझै उनीहरु क्याबर्लीस्थित सो एसिया रेस्टुरेन्टमा आयोजित पत्रकार सम्मेलनमा पुगेका थिए ।

पत्रकार सम्मेलनमा राईले भोलि अल्डरसटस्थित एम्पाएर ब्याङक्यूटिङ हलबाट सो चलचित्रको प्रदर्शन शुरु हुने र त्यसपछि १२ मेमा उलवीच ट्रान्स थियटरमा, १५ मेमा ह्यारो सफारी सिनेमामा, १६ मेमा ग्रानथाम, २० मेमा मेडिस्टोन, २१ मेमा क्याट्रिक र २२ मेमा स्कटल्याण्डकाे एबरडिनमा प्रदर्शन हुने जानकारी दिए । यसबाहेक अरु शोको लागि पनि छलफल भइरहेको उनले बताए ।
सो चलचित्रबाट निर्देशनमा डेब्यु गरेका भुवन केसीले ‘ड्रिम्स’ आफ्नो, अनमोल र नेपाली चलचित्र क्षेत्रकै ड्रिम्स भएको बताए । तीनदशक नेपाली चलचित्रमा अभिनय र निर्माणमा बिताएका केसीको निर्देशनको यो पहिलो चलचित्र हो । चलचित्र सबै उमेर समूहलाई मनपर्ने र ‘राम्रो’ चलचित्र भएकाले हेरिदिन उनले अनुरोध गरे ।

पत्रकार सम्मेलनमा उपस्थित चलचित्रका नायक तथा भुवन केसीका छोरा अनमोलले आफ्नै पिताको निर्देशनमा काम गर्दा कतिपय बेला सजिलो भए पनि ‘रोमान्स’को सिनमा लाज लागेको बताए । आफूले अभिनय गरेका चलचित्रका सहकर्मीहरुसित चलचित्र बाहिर पनि राम्रो सम्बन्ध रहेको प्रष्ट पार्दै उनले यदि कसैसित काम गर्न रोज्नुपर्यो भने गौरी मल्लसित काम गर्ने इच्छा व्यक्त गरे ।
युवापुस्तामा लोकप्रिय बन्दै गरेका अनमोलको रोजाइ पनि अनौठो छ । जबकि उनका पिता भुवनले गौरी मल्लसित कन्यादान, राँको लगायतका चलचित्रमा अभिनय गरिसकेका छन् ।

निर्देशक भुवन केसीले नेपाली चलचित्रको बजार विगतमा पनि राम्रो रहेको र अहिले पनि राम्रो रहेको धारणा व्यक्त गर्दै तर फिल्म ‘राम्रो’ बन्नपर्ने बताए । निर्देशनमा हात हाले पनि आफू कलाकार नै भएको र बाँचुन्जेल अभिनय गर्ने उनले प्रष्ट पारे ।
नाकाबन्दी र भूकम्पका कारण चलचित्रको लागत बढे पनि बक्स अफिसमा धेरै कमाउने चलचित्रमा दरिने विश्वास उनले व्यक्त गरे ।

साे चलिचत्र यसअघि हङकङ, अष्ट्रेलिया,जापानमा प्रदर्शन भइसकेकाे छ र चाँडै अमेरिकाका विभिन्न राज्यमा हुने बताइएकाे छ ।

प्रतिक्रिया

सम्बन्धित सामाग्री

फेसबुक