मंगलबार, माघ ६ २०७७ | Tue, January 19, 2021
नेपालको समय: ०४:३४ | UK Time: 22:49

साहित्यकार थापाको ‘क्याक्मीको कोसेली’ विमोचित

वीनेपाली
२०७३ वैशाख २१ गते १६:०२

image5

लन्डन । बेलायतवासी साहित्यकार कवि घन बहादुर थापा मगरको कविता सङग्रह ‘क्याक्मीको कोसेली’ लोकार्पण भएको छ । नेपाली साहित्य विकास परिषद् यू.के. र यसको नेपाल च्याप्टरले काठमाण्डौंमा आयोजना गरेको एक समारोहबीच संग्रह विमोचन गरिएको हो । संस्कृति, पर्यटन तथा नागरिक उड्ययन राज्यमन्त्री बल बहादुर महतको प्रमुख आतिथ्यमा नेपाली साहित्य विकास परिषद् नेपाल च्याप्टरकी अध्यक्ष साहित्यकार इल्या भट्टराईको अध्यक्षतामा कार्यक्रम भएको थियो । समारोहमा राज्यमन्त्री महतले देश विकासमा साहित्यकारहरूको पनि ठूलो भूमिका हुने जनाउंदै विचार सिद्धान्त फरक फरक भए पनि देश विकासमा सबै एक भएर लाग्नुपर्नेमा जोड दिए ।

युवा समालोचक मुक्ति घिमिरेले कृतिमाथि प्रकाश पार्दै घन बहादुरका कविता देश प्रेमको भावनाले ओतप्रोत निश्चल कवि मनको प्रस्फुटन हो भने । कवि गोपाल पराजुलीले पनि संग्रहबारे बोलेका थिए ।

कार्यक्रममा हरिशरण लामिछाने, इल्या भट्टराई, निमा वाङ्गेल लामा, देवकुमार मानन्धर, मुक्ति बहादुर घर्ती मगर, थम बहादुर छन्त्याल आदिले थापाको साहित्यिक व्यक्तित्व र कविताबारे प्रकाश पारे । उक्त समारोह सम्पन्न गर्न जयदेव भट्टराई, गोबिन्दप्रसाद श्रेष्ठ, डा. प्रभा कैनी, व्याकुल पाठक, ललिता दोषी, आनन्द कार्की, राजेश जङ्ग शाह तथा नेत्र पौडेल आदिको भूमिका उल्लेख्य थियो ।

कवि थापाले कविता संग्रह बिक्रीको केहि रकम भूकम्पबाट प्रभावित क्याक्मी गा.वि.स. स्थित पोखरी भज्याङ्ग नि.मा. विद्यालयको पुनः निमार्णमा खर्चिने बताएका छन् ।

प्रतिक्रिया

सम्बन्धित सामाग्री

फेसबुक