आगलागी पीडित आचार्य परिवारलाई एनआरएनए यूकेबाट सहयोग
आगलागीबाट जलेको घर
लन्डन । एनआरएनए यूकेले आगलागी पीडित एक नेपाली परिवारलाई २ हजार ४२ पाउण्ड सहयोग गरेको छ । बेलायत लेस्टर बस्ने मधुसुदन आचार्यको परिवारलाई उक्त रकम प्रदान गरिएको हो ।
फ्रिजमा उच्च तापक्रमका कारण आगलागी भएर आचार्य बस्ने फ्ल्याटसहित सम्पूर्ण जिन्सी सामाग्री खरानी भएपछि उनले नेपाली समुदायबाट सहयोग अपिल गरेका थिए । आचार्य श्रीमति दुर्गा खनाल, छोरी प्रिन्सेस र छोरा प्रनिस आचार्यका साथ उक्त वान बेड रुम स्टुडियो फ्ल्याटमा बस्थे ।
उक्त समाचार वीनेपालीमा पहिलोपटक प्रकाशित भएपछि एनआरएनए यूके कोषाध्यक्ष दीपक श्रेष्ठले आर्थिक संकलनको नेतृत्व गरेका थिए ।
संघले आफ्नो वेलफेयर फण्डबाट ३०० पाउण्ड दिएको थियो भने गायक योगेश्वर अमात्यले नेपालबाटै ५०० पाउण्ड प्रदान गरे ।
एनआरएनए यूके अध्यक्ष मुछेत्र गुरुङ र कोषाध्यक्ष श्रेष्ठले सहयोगदाताहरुप्रति आभार व्यक्त गरेका छन् । श्रेष्ठले पीडित आचार्यका लागि थालिएको चन्दा संकलन अभियान आज सोमबारबाटै बन्द गरिएको जनाए । आर्थिक सहयोग गर्न प्रतिवद्धता व्यक्त गरे बमोजिम १५२ पाउण्ड भने उठ्न बांकी छ ।
