नारायणकाजी श्रेष्ठ
ललितपुर, १७ वैशाख । एकीकृत नेकपा (माओवादी)का उपाध्यक्ष नारायणकाजी श्रेष्ठले नेकपा(माओवादी) वैद्य समूहसँग पार्टी एकीकरण छिट्टै हुने बताउनुभएको छ ।
क्रान्तिकारी पत्रकार सङ्घ नेपाल ललितपुरको दोस्रो सम्मेलन तथा सम्मान एवम् पुरस्कार वितरण कार्यक्रममा आज उहाँले दुई पार्टी एकीकरणका लागि पार्टीभित्र अन्तिम तयारी भइरहेको बताउनुभएको हो ।
यसबाहेक माओवादीबाट फुटेर गएका नेत्रविक्रम चन्द तथा मातृका यादवले नेतृत्व गरिरहेको माओवादी पार्टीसँगसमेत पार्टी एकीकरणमा ल्याउने पहल भइरहेको उहाँले उल्लेख गर्नु भयो ।
पत्रकार ओम शर्माले समाज रुपान्तरणमा प्रभावकारी रुपले पत्रकार अघि बढ्नुपर्ने बताउनुभयो ।
क्रान्तिकारी पत्रकार सङ्घ नेपालका केन्द्रीय संयोजक गोविन्द आचार्यले अझै पनि ३६ जना क्रान्तिकारी पत्रकार बेपत्ता भएको बताउनुभयो । उहाँले पत्रकार महासङ्घलाई सङ्घीय संरचनाअनुरुप लैजानुपर्नेमा जोड दिनुभयो ।
पत्रकार महासङ्घ ललितपुरका अध्यक्ष लेखनाथ न्यौपानेले पत्रकार हकहितका लागि महासङ्घ सदैव क्रियाशील रहने प्रतिबद्धता व्यक्त गर्नुभयो ।
सो अवसरमा कृष्णसेन इच्छुक पत्रकारिता पुरस्कारबाट बलराम थापा पुरस्कृत हुनुभएको थियो । यसैगरी मिलन नेपाली साहसिक पत्रकारिता पुरस्कारबाट पत्रकार महासङ्घ ललितपुरका अध्यक्ष लेखनाथ न्यौपानेलाई पुरस्कृत गरिएको थियो । पुरस्कारको राशी क्रमशः रु पाँच हजार १०० रहेको छ ।
यसैगरी महासङ्घका पूर्वमहासचिव ओम शर्मालाई सशक्त मिडिया उद्यमीबाट सम्मान गरिएको थियो । यस्तै महासङ्घका उपाध्यक्ष खिलबहादुर भण्डारीलाई स्वरोजगारमूलक श्रमजीवी पत्रकारबाट सम्मान भएको थियो । महासङ्घका महासचिव उजीर मगरलाई सो कार्यक्रममा सम्मान गरिएको थियो ।
