जेनेभा, ४ वैशाख । सिरियाली प्रतिपक्षी दलले वर्तमान राष्ट्रपति बसर अल असदलाई गठबन्धन सरकारको नेतृत्व दिएर प्रतिपक्षबाट तीन जना उपराष्ट्रपति राख्ने प्रस्तावलाई अस्वीकार गरेका छन् ।
शान्ति वार्तामा सरकार र प्रतिपक्षीलाई ल्याउने पहलस्वरुप संयुक्त राष्ट्रसङ्घका सिरिया मामिला प्रमुख स्टेफेन डे मिस्टुराले शुक्रबार असदसँग सो प्रस्ताव राख्नुभएको थियो ।
सङ्क्रमणकालीन सरकारको नेतृत्व असदलाई दिने र तीन उपराष्ट्रपति प्रतिपक्षबाट राख्न मिस्टुराले प्रस्ताव गर्नुभएको थियो ।
सिरियामा विगत पाँच वर्षदेखि चल्दै आएको युद्ध रोकी शान्ति कायम गर्ने प्रयास स्वरुप सरकारी प्रतिनिधि तथा प्रतिपक्षीहरुको उच्चस्तरीय वार्ता टोली नयाँ चरणको वार्ताका लागि जेनेभा पुगे पनि वार्ता प्रयासले सकारात्मक रुप पाउन सकेको छैन ।
असद औपचारिक रुपमा राष्ट्र प्रमुख रहने प्रस्ताव हामीलाई कदापी स्वीकार्य छैन, प्रतिपक्षीको उच्चस्तरीय वार्ता टोलीले बतायो ।
संयुक्त राष्ट्रसङ्घको सहयोगमा राजनीतिक सङ्क्रमण कालको घोषणा गरी नयाँ संविधान संसदीय निर्वाचन र राष्ट्रपतीय निर्वाचनको काम सन् २०१७ को सेप्टेम्बरसम्म सक्ने गरी प्रस्ताव ल्याएको हो ।
सिरियाली प्रतिपक्षीको पहिलो सर्त असद सत्ताबाट बाहिरिनु पर्नेछ । विपक्षी वार्ता टोलीले असद बाहिरिएमा सरकारी कूटनीतिज्ञ तथा व्यवसायीलाई वार्तामा सहयोग गर्ने बताएको छ ।
उच्चस्तरीय वार्ता टोलीका प्रवक्ता सालेम अल मेसलेटले दुई लाख ७० हजार मानिसको मृत्यु भएको गृहयुद्ध समयमा असद र असदलाई सघाउन मुख्य भूमिका खेल्ने कोही पनि सङ्क्रमणकालीन सरकारको राष्ट्रपति हुने कुरा आफूहरुलाई स्वीकार्य नहुने बताउनुभयो ।