लन्डन । चल्तीकी नायिका प्रियंका कार्की र लोकप्रिय गायकद्वय हेमन्त शर्मा र शिव परियार यतिखेर बेलायतमा छन् ।
७ तारिख लन्डन उत्रिए देखिनै व्यस्त छन् यी तीन कलाकार । शुक्रबार सांझ नेपलिज ब्रिटिश कम्युनिटीले ह्यारो बरो फुटबल क्लवमा आयोजना गरेको नयां वर्ष शुभकामना कार्यक्रममा उनीहरुले वाहीवाही बटुले । प्रियंकाको कम्मर माथि पटुकी होस् वा सुर्के थैली, दर्शक उनको आकर्षक नाच हेर्न लालयित भइरहे ।
गायक हेमन्त शर्मा भने कहिले मुल हौ भने रसाइदेऊ भन्दै अनुनय गर्दै थिए भने कहिले माया सार्है महंगो रहेको गुनासो गर्दैै थिए दर्शकसंग । उनका पुराना नयां गीतले दर्शक नाचिरहे । कम थिएन् शिव परियारको प्रस्तुति पनि । मादक पदार्थमा झुमिरहेका हुन् वा पानी जुस पिइरहेका दर्शक । उनले सुनाइरहेको पिउंदिन भन्दा भन्दै पिलायो साथीले अनि बेहोसपछि त होसमा आउंदा क्या दामी भो…गाएपछि त दर्शक मज्जाले नाचिहाले ।
कार्यक्रम हेर्न मानिसहरुको तंछाडमंछाड थियो । आयोजकले लामो मन्तव्य राखेर, हल सांघुरो भएर दर्शकले सास्ती खेप्नु परेपनि तीन कलाकारको बेजोड प्रस्तुतिले कार्यक्रमको रौनकता बेग्लै रह्यो ।
बसन्त नेपालले सञ्चालन गरेको उक्त कार्यक्रममा कम्युनिटी अध्यक्ष कमलराज खनाल, सांसदद्वय बीरेन्द्र शर्मा र ग्यारेथ थोमस, दूतावासका थर्ड सेक्रेटरी बाबुकाजी डंगोल, एनआरएनए युरोप संयोजक कुल आचार्य, लन्डन एसेम्ली मेम्बर डा. ओन्कार सहोता, कम्युनिटीका सचिव मिलन घिमिरे लगायतले नयां वर्षको शुभकामना दिए ।
यी कलाकार आज आसफोर्ड र भोलि अल्डरसट कार्यक्रममा हुनेछन् ।
छक्का पन्जाको सुटिङ बीचमै छाडेर यता आएकी प्रियंका केही दिनभित्रै स्वदेश फिर्नेछिन् । तर, गायक शर्मा र परियार भने केही हप्ता बस्ने कार्यक्रम छ । शर्माले आगामी १५ मा फोकस्टोन, १६ मा टिडवर्थ, १७ मा लिभरपुल, २४ मा रेडिङसहित स्कटल्याण्ड लगायत शहरमा कार्यक्रम गर्न लागिएको जनाए ।
तस्विरः सुरज पौडेल
