आमरण अनसन बस्नु अघि भूपू गोर्खाहरुको विशेष बैठक

लन्डन । बेलायत सरकारलाई अन्तिम धक्का दिन आमरण अनसन बस्नु अघि भूपू गोर्खाहरुले आवश्यक छलफल गर्न विशेष बैठक डाकेका छन् । आफ्ना माग पुरा गराउन २४ अप्रिल २०१६ सम्मको समयसीमा दिएका भूपू गोर्खाहरुले सरकारबाट हालसम्म कुनै ‘रेस्पोन्स’ नआएकाले आमरण अनसन अन्तिम विकल्प भएको जनाउंदै त्यसबारे विस्तृत छलफल गर्न बैठक डाकेका हुन् ।

गोर्खा सत्याग्रह संयुक्त संघर्ष समिति बेलायत, नेपालले आगामी १७ अप्रिल बिहान ११ बजे ह्यारो बरो फुटबल क्लबमा बैठक राखेको छ । समितिले समस्त भूपू गोर्खा एवं अन्य नेपालीलाई बैठकमा उपस्थित भई सरसल्लाह र सुझाव दिन विनम्र अनुरोध गरेको छ ।

‘अप्रिल २४ हाम्रो संघारमै आइपुगिसकेको छ । त्यो दिनसम्ममा कुनै चमत्कार भएन भने हामीले ज्ञापनपत्रमा भने अनुसार आमरण अनसन बस्नुको कुनै विकल्प हुने छैन्’, समितिले भनेको छ, ‘त्यसैले हामीले उपयुक्त विषयमा गम्भीर वहस र व्यापक छलफल गरी उचित निष्कर्षमा पुग्न टड्कारो आवश्यकता भएको छ ।’

सन् २०१३ मा भएको आमरण अनसनपछि गठित सर्वदलीय संसदीय आयोगले डेभिड क्यामरुन सरकारलाई पेश गरेको प्रतिवेदन अनुरुप आफ्ना पांच सूत्रीय मागहरु छुंदै नछोएको गुनासो भूपू गोर्खाहरुको छ । भूपू गोर्खाहरुले त्यसयता प्रशस्त दवावमुलक कार्यक्रम गरिसकेका छन् । उनीहरुले आफू नेपालकै नागरिक भएको र अभिभावक नेपाल सरकार भएकाले आफ्ना पदाधिकारीहरु नेपाल गएर राष्ट्रपति, प्रधानमन्त्री, परराष्ट्रमन्त्री, प्रमुख नेताहरु देखि सांसदहरुलाई पटक पटक हारगुहार गरेको समेत जनाएका छन् ।

सत्याग्रह समितिका संयोजक कृष्ण बहादुर राई सम्भव भएसम्म आमरण अनसन होइन, नेपाल सरकार मार्फत अन्य उपायबाट नै मागहरु पुरा गराउने उद्देश्य राखेर अहिले पनि नेपालमा भेटघाटमा व्यस्त रहेको समितिले जनाएको छ ।