३५ हजार नकमाउने कामदारले देश छाड्नुपर्ने

लन्डन । बेलायतमा बस्ने र काम गर्नेहरुका लागि यो अप्रिल, २०१६ ले धेरै परिवर्तन ल्याउने भएको छ । धेरै नयां कानुन र नीतिहरु यसै महिनादेखि कार्यान्वयनमा आउंदैछन् । नयां कानुनले गैर युरोपेलीमात्र होइन, बेलायती नागरिक समेत प्रभावित हुने छन् ।

दि इन्डिपेन्डेन्ट पत्रिकाका अनुसार, वार्षिक ३५ हजार पाउण्ड भन्दा कम्ती कमाउने गैर युरोपेली कामदार ५ वर्ष भन्दा बढि यो देशमा बस्न नपाउने नियम आउन लागेको छ । नयां नियमले नर्स, पिएचडी लेभल जागिर र सर्टेज अकुपेशन लिष्टमा रहेकालाई भने असर गर्ने छैन् । यद्यपि, शिक्षक र आइटी अनि मार्केटिङ क्षेत्रमा काम गर्नेले भने छिट्टै फर्कनुपर्ने पत्रिकाको दावी छ । यस परिवर्तन विरुद्ध एक लाख हस्ताक्षर समेत बुझाइएको थियो ।

इंग्ल्याण्डमा ब्यान्ड डि प्रोपर्टीमा बस्नेले करिब ५८ पाउण्डका दरले काउन्सिल ट्याक्स बढि तिर्नुपर्नेछ । ठूला घरहरुमा बस्नेले त यो भन्दा बढि तिर्नुपर्नेछ । आठ वर्ष यता यसपटक नै सबैभन्दा धेरै काउन्सिल कर वृद्धि गरिएको हो । देशका एकसय भन्दा बढि काउन्सिलले ४ प्रतिशतसम्म कर बढाउंदैछन् ।

गत १ अप्रिलदेखि नेशनल लिभिङ वेज ७.२० पाउण्ड प्रति घण्टा बनाइएको छ ।

आज ६ अप्रिलदेखि इंग्ल्याण्ड, वेल्स र स्कटल्याण्डका कुकुर मालिकहरुले माइक्रो चिप राख्नुपर्ने कानुन लागू हुंदैछ । प्रत्येक धनीले घर पालुवा जनावरको विवरण पेटलग डेटाबेसमा राख्नुपर्नेछ । यसले हराएका कुकुर खोज्न सजिलो हुने र करदाता एवं च्यारिटीको वार्षिक खर्च ३३ मिलियन पाउण्ड जोगिने अपेक्षा छ ।

इंग्ल्याण्डमा एनएचएस प्रिस्क्रिप्सन शुल्क १ अप्रिलदेखि २० पेन्स वृद्धि गरि ८.४० पाउण्ड प्रति आइटम बनाइएको छ ।

साथै, ४० हजार पाउण्ड माथिको मुल्यमा दोश्रो घर किन्ने र बाइ टु ल्यान्डलडर्सले तीन प्रतिशत बढि स्ट्याम्प ड्यूटी तिर्नुपर्ने नयां नियम १ अप्रिलदेखि लागू भइसकेको छ । अप्रिल अघि अढाइ लाख पाउण्डको अतिरिक्त जायजेथा किन्नेले स्ट्याम्प ड्यूटी २५ सय पाउण्ड तिर्नुपथ्र्यो भने अब दशहजार पाउण्ड तिर्नुपर्नेछ ।

अन्य केही नियमहरु पनि कार्यान्वयनमा आउने जनाइएको छ ।