प्रियंका उत्रिए लगत्तै साउथ ह्यारो शोमा

लन्डन । ‘हट केक’ सेलिब्रेटी प्रियंका कार्की वर्षदिन नपुग्दै लन्डन आउंदैछिन् यही साता । गायकहरु हेमन्त शर्मा र शिव परियारका साथ ७ तारिख लन्डन उत्रने नायिका प्रियंकाले पहिलो कार्यक्रम आफैं चलाउने भएकी छिन् ।

साउथ ह्यारोस्थित ह्यारो बरो फुटबल क्लव हलमा ८ अप्रिल सांझ हुने तय भएको नेपाली नयां वर्ष कार्यक्रममा प्रियंका ‘होस्ट’ का रुपमा प्रस्तुत हुनेछिन् ।

नेपलिज ब्रिटिश कम्युनिटी यूकेले कार्यक्रम आयोजना गरेको हो । उक्त संस्थाले प्रियंकासहित तीन कलाकारलाई १२ सय पाउण्ड दिने शर्तमा कार्यक्रममा बोलाएको हो । उनीहरु खास आसफोर्डको कार्यक्रममा आएका हुन् ।
नेपाली दूतावास प्रतिनिधि, स्थानीय सांसदहरु, बज फिड र बीबीसी एजियन नेटवर्कसहितका नेपाली पत्रकार, एनआरएनए युरोप संयोजक कुल आचार्य लगायत अन्य विशेष अतिथीमाझ नयां वर्ष मनाइने कम्युनिटी अध्यक्ष कमलराज खनालले जानकारी दिए । खनालले टिकट ‘सोल्ड आउट’ भइसकेको बताएका छन् । भूकम्प आएको झण्डै वर्षदिन हुनै लाग्दा कम्युनिटीले कार्यक्रमबाट बचेको केही रकम भूकम्प पीडितलाई दिने जनाएको छ ।