लण्डन । युकेको ठूलो सामाजिक संस्थामध्ये एक मगर संघ युकेको अध्यक्षमा नेम थापामगर चयन भएका छन् ।
संघको शनिबार अल्डरसटमा सम्पन्न पाँचौँ राष्ट्रिय महाधिवेसनले थापालाई अध्यक्षमा निर्वाचित गरेको हो । शनिबार नै सम्पन्न मतदानमा थापाले १९१ मत प्राप्त गरे भने अध्यक्ष पदका अर्का प्रत्याशी हिमाली रानामगरले ६० मत प्राप्त गरिन् ।
वरिष्ठ उपाध्यक्ष पदमा योगकुमार फगामी निर्विरोध निर्वाचित भएका छन् भने उपाध्यक्ष पदमा बम थापा सूर्यवंशीमगर र श्रीमती सीता पुनमगर चुनिएका छन् । उनीहरुले क्रमशः २०५ र १७३ मत ल्याए उपाध्यक्ष पदका अर्का उम्मेदवार ईन्द्र पुनले ९५मत मात्र ल्याए । महिला उपाध्यक्ष पदमा श्रीमती अनिता रानामगर निर्विरोध भएकी छिन् ।
महासचिव पदमा लालबहादुर पुन, सचिवमा वीरप्रसाद घर्तीमगर, कोषाध्यक्षमा नेत्र आलेमगर, सहकोषाध्यक्ष पदमा होम रोका सर्वसम्मत निर्वाचित भएका छन् । १२ जना सदस्यका लागि भएको निर्वाचनमा रमेश राना, मोहन आलेमगर, निर्मल श्रीश, दीप राना, वीरबहादुर पुन, रुद्र थापामगर, धनकुमार बुढामगर, दधिबन्धु घर्तीमगर, तुलचन्द्र तिलिजा, रमेशकुमार दुरामगर, श्रीमती दुर्गा पुन र श्रीमती धन रोकामगर निर्वाचत भएका छन् ।
नवनिर्वाचित कार्यसमितिलाई निर्वाचन समितिका संयोजक मेजर रिटायर्ड सान्त पुनले सपथ गराएका थिए भने संस्थापक अध्यक्ष थर्कबहादुर राना खादा र निवर्तमान अध्यक्ष दुतबहादुर पुनले टीक लगाएका थिए ।
नवनिर्वाचित अध्यक्ष थापाले मगर संघ युकेलाई आन्तरिक र बाह्यरुपमा सशक्त बनाएर लैजाने प्रण गरेका थिए ।
यसअघि सम्पन्न बन्दसत्रमा संघको आर्थिक, सांगठानिक, विधान संशोधन प्रतिवेदन पारित गरिएको थियो । यस्तै विभिन्न शाखाहरु तथा केन्द्रीय विभागहरुले आफ्ना प्रतिवेदन पेश गरेका थिए ।
अध्यक्ष दुतबहादुर पुनको अध्यक्षतामा भएको खुला तथा बन्द सत्रमा मगर संघ युकेका सल्लाहकारहरु तथा विभिन्न ओहोदामा जिम्मेवारी लिएका मगरहरुलाई बधाई दिइएको थियो । जसमा नेपाल पत्रकार महासंघ युकेका अध्यक्ष नरेश खपाङ्गीमगर र महासचिव लीलामान शेरपुन्जामगर, मगर महिला संघ युकेका अध्यक्ष छविमाया पुन लगायत थिए ।