बेलायतमा विवाहित सुन्दरीको खोजी

लन्डन । इभेन्ट्स एण्ड आइडियाज् प्रोडक्शनले बेलायतमा पहिलो पटक मिसेस यूके नेपाल २०१६ प्रतियोगिता गर्ने भएको छ ।

मिसेस यूके नेपाल २०१६ को पहिलो अडिसन ७ मे शनिवार फार्नवोरोस्थित गोर्खा प्यालेस रेष्टुरेन्टमा बिहान ११ देखि २ बजेसम्म र ग्राण्ड फिनाले आगामी ३० जुलाई, २०१६ मा इम्पायर हल, अल्डरसटमा तय भएको छ ।

विवाहित भएपनि आफ्नो प्रतिभा देखाउन वञ्चित महिलाको चाहनालाई मध्यनजर गर्दै यस्तो प्रतियोगिता गर्न लागिएको प्रोडक्सनकी 
निर्देशक शान्ति गुरुङले जनाइन् ।

मिसेस यूके नेपाल २०१६ उपाधि जित्नेलाई ८०० पाउण्ड, फष्ट रनरअपलाई ५०० पाउण्ड र सेकेन्ड रनरअपलाई ३०० पाउण्ड नगदसहित क्राउन 
दिइनेछ । आयोजकले प्रतियोगितामा भाग लिन इच्छुक महिलालाई सम्पर्क गर्न भनेका छन् । सम्पर्क इमेलमार्फत [email protected] र मोवाइल नं. 07578365566  मा सम्पर्क गरि नाम दर्ता प्रक्रिया अगाडि बढाउन सक्नेछन् ।

यसैबीच, इभेन्ट्स एण्ड आइडियाज् प्रोडक्सनले एकैसाथ मिस यूके नेपाल पनि गर्ने भएको छ । गत वर्ष स्थगित पांचौं मिस यूके नेपालको अडिसन पनि ७ मे शनिवार कै दिन गोर्खा प्यालेस रेष्टुरेन्ट फार्नवोरोमा गर्ने निर्णय भएको हो । सो को ग्राण्ड फिनाले आगामी सेप्टेम्बरमा गर्ने भनिएपनि मिति र स्थान भने तोक्न बांकी छ ।

सुन्दरी अभावका कारण मिस यूके नेपाल गर्न आयोजकले सास्ती खेप्दै आएका छन् । इभेन्ट एण्ड आइडियाजकी निर्देशक गुरुङले इच्छुक युवतीहरुलाई सम्पर्क गर्न अपिल गरेकी छिन् ।

विजेताले मिसेस यूके नेपालकै सरह क्राउन र नगद राशी प्राप्त गर्नेछन् ।
सन् २०१० देखि शुरु मिस यूके नेपाल प्रतिष्पर्धी अभावकै कारण सन् २०१३ मा स्थगित गर्नुपरेको थियो । अध्ययन, जागिरले समय अभाव र भौगोलिक अवस्था पनि प्रतियोगी खडेरी हुने कारक रहेको अनुभव आयोजकसंग छ ।

यसअघिका प्रतियोगिताले क्रमशः नवीना गुरुङ, गौमाया गुरुङ, दुर्गा गुरुङ र निया देवानलाई मिस यूके नेपालको उपाधि दिलाइसकेको छ ।