राष्ट्रसङ्घीय सुरक्षा परिषदद्धारा लाहोर आक्रमणको निन्दा

सुरक्षा परिषदद्धारा जारी एक प्रेस बिज्ञप्तिमा पाकिस्तानको लाहोरमा गरिएको सो आतङ्कवादी हमलामा परी ज्यान जाने व्यक्तिप्रति हार्दिक श्रद्धाञ्जलि पनि व्यक्त गरिएको छ ।

पाकिस्तानको पूर्वी भागमा रहेको लाहोर सहरमा रहेको एक सार्वजनिक पार्कमा भएको यस आत्मघाती आक्रमणमा परी ७२ जनाको मृत्यु भएको छ । साथै सो हमलामा परी अरु करिब ३०० जना घाइते भएका छन् ।

परिषदद्धारा जारी विज्ञप्तिमा यस आक्रमणमा मारिएका व्यक्तिप्रति श्रद्धाञ्जलि व्यक्त गर्दै उनीहरुका परिवारजनप्रति समवेदना प्रकट गरिएको छ । साथै घाइते व्यक्तिहरुको शीघ्र स्वास्थ्यलाभको कामना गरिएको छ ।

आइतबार साँझ सार्वजनिक पार्कमा विदा मनाउन गएका बालबालिका र निर्दोष नागरिक गरी ७२ व्यक्तिको मृत्यु हुनुको साथै अन्य ३ सय भन्दा बढी घाइते भएको यस घटनाको जिम्मेवारी पाकिस्तानी तालिवानसँग सम्बन्धित एक आतङ्ककारी समूह जमात उल अहरारले लिएको छ ।
सो आक्रमण आफूहरुले गराएको सो समूहले आइतबारै अबेर राति जानकारी दिएको थियो । त्यस समूहले पाकिस्तानमा रहेका अल्पसङ्ख्यम क्रिश्चियन समुदायलाई लक्ष्य गरेर गरेको बताएको छ ।

पाकिस्तानी प्रधानमन्त्री नवाज शरिफले त्यस आक्रमणमा सम्लग्नलाई कडा भन्दा कडा कारबाही गरिने बतउनुभएको छ ।
उहाँले पाकिस्तानी जनताको सुरक्षाका लागि कुनैपनि हालतमा पाकिस्तानी भुमिमा हुने आतङ्कवादी क्रियाकलापको अन्त्य गरिने बताउनुभयो ।