वडा नम्बर ६ प्रदर्शन आज सांझ

लन्डन । अहिलेको सर्वाधिक सफल चलचित्र वडा नम्बर ६ आज प्रदर्शन हुने भएको छ । सांझ ६ बजे द इम्पायर हाउस, अल्डरसटमा फिल्म प्रदर्शन हुन लागेको हो । नेपलिज इन्टरटेनमेन्टका लागि वीरेन खड्का र अनिल मल्लले फिल्म बेलायतमा ल्याएका हुन् । खड्कालाई उक्त फिल्म बेलायतभर प्रदर्शन गर्ने अधिकार छ ।

खड्काले दशैं तिहार शुभकामनासहित भरपुर मनोरन्जन दिन वडा नम्बर ६ देखाउन लागिएको जनाएका छन् ।

करिब ८० लाख रुपैयांको लगानीमा बनेको उक्त चलचित्र उज्जवल घिमिरेले निर्देशन गरेका हुन् । चलचित्रमा दीपकराज गिरी, दीपाश्री निरौला, जितु नेपाल (मुन्द्रे), केदार घिमिरे (माग्ने बुढो), सिताराम कट्टेल (धुर्मुस), विल्सन विक्रम राई (तक्मे बुढो), 
राजाराम पौडेल जस्ता चर्चित हास्यंकलाकारसहित अभिनेता नीर शाह, नायिका प्रियंका कार्की, सन्दिप क्षेत्री, दयाहाङ राई लगायतको अभिनय छ ।
हांस्यकलाकारहरुको निर्माण र अभिनय भएपनि माओवादी द्वन्द्वका बेलाको मार्मिक कथामा आधारित भएकाले दर्शक मन जितेको विश्लेषकहरुको भनाइ छ ।