डरहाम गिर्जाघरद्वारा भूकम्प पीडितका लागि च्यारिटी

लन्डन । बेलायतको डरहाम गिर्जाघरले भूकम्प पीडित परिवार र वृद्ध भूपू गोर्खाहरुका लागि एक च्यारिटी कन्सर्ट गरेको छ ।

ब्रिगेड अफ दि गोर्खाज् ब्याण्डको प्रस्तुति र सेकेन्ड बटालियन, दि रोयल गोर्खा राइफल्स् को पाइप र ड्रमको धुनमा आयोजित च्यारिटीबाट संकलित रकम गोर्खा वेलफेयर ट्रष्टमार्फत नेपालमा खर्च गरिने गिर्जाघरले जनाएको छ ।

विगत १५ वर्ष यता यस खालको कन्सर्ट गरेर गिर्जाघरले एकलाख ५० हजार पाउण्ड संकलन गरिसकेको छ ।

कन्सर्ट प्रायोजन गरेको शेरउड्स कार डिलरसीपका प्रवन्ध निर्देशक अलासडेयर म्याक कोनाचीले आफ्नो स्वर्गीय पिताले बर्मामा ५ औं गोर्खा बटालियनको कमाण्ड लिएको स्मरण गर्दै भूपू गोर्खाहरुका लागि समर्पित उक्त च्यारिटी विशेष भएको जनाए ।

कार्यक्रम आयोजक गोर्खा वेलफेयर ट्रष्ट, योर्कसायर शाखाका लेफ्टिनेन्ट कर्णेल किथ राइडिङले गोर्खाहरुले ब्रिटेनको रक्षार्थ दुई सय वर्ष देखि लडिरहेको जनाउंदै उनीहरुप्रति सम्मान गरिनुपर्ने उल्लेख गरे ।