प्रधानमन्त्री पदमा ओली र कोइरालाको उम्मेदवारी, ओलीको सम्भावना बढी

koirala_oli - Copyकाठमाडौँ । एमाले अध्यक्ष केपी शर्मा ओली र काँग्रेस सभापति सुशील कोइरालाले छुट्टा छुटै रुपमा प्रधानमन्त्रीका लागि उम्मेदवारी दर्ता गराएका छन् । दुबैले नयाँ प्रधानमन्त्रीको लागि उम्मेदवारी दर्ता शनिबार गराएका हुन् ।

ओली र कोइरालाले व्यवस्थापिका–संसद् भवन नयाँ बानेश्वर पुगेर प्रधानमन्त्री पदको उम्मेदवारी दर्ता गराएका थिए । ओलीको प्रस्तावकमा एमाओबादी अध्यक्ष प्रचण्ड छन् भने समर्थकमा राप्रपा अध्यक्ष कमल थापा छन् । कोइरालाको प्रस्तावकमा वरिष्ठ नेता शेरबहादुर देउवा छन् भने समर्थकमा उपसभापति रामचन्द्र पौडेल छन् ।

काँग्रेसको आज बिहान बसेको केन्द्रीय कार्य समिति र संसदीय दलको संयुक्त बैठकले कोइरालालाई नै प्रधानमन्त्रीको उम्मेदवार बनाउने निर्णय गरेको थियो । सोही निर्णयका आधारमा उम्मेदवारी दर्ता गराइएको काँग्रेसले जनाएको छ । राष्ट्रपति डा रामवरण यादवसमक्ष प्रधानमन्त्रीको पदबाट राजीनामा दिएर आएलगत्तै कोइरालाले उम्मेदवारी दर्ता गराएका हुन् ।

व्यवस्थापिका–संसद् सचिवालयले आज बिहान ११ बजेदेखि अहराह्न ४ बजेसम्म प्रधानमन्त्रीका लागि उम्मेदवारी दर्ता गराउने समयसीमा दिएको छ । उम्मेदवारी दर्ता गराउने समयसीमा सकिएलगत्तै अपराह्न ४।३० बजे अन्तिम नामावली प्रकाशित गर्ने कार्यसूची छ ।

आइतबार बिहान ११ बजे बस्ने बैठकमा प्रधानमन्त्रीको उम्मेदवारको समर्थक र प्रस्तावकले धारणा राखेपछि मतदान प्रक्रिया सुरु हुने सचिवालयले जनाएको छ ।

प्रतिक्रिया

सम्बन्धित सामाग्री