पोखरा, १६ असोज । नेपाल उद्योग वाणिज्य सङ्घका अध्यक्ष पशुपति मुरारकाले ५२ दिनदेखिको मधेस बन्द र भारतको अघोषित नाकाबन्दीले उद्योगधन्दा धरासायी भएको बताउनुभएको छ ।
पोखरा उद्योग वाणिज्य सङ्घको ६१औँ वार्षिक अधिवेशनको आज यहाँ उद्घाटन गर्दै उहाँले नयाँ संविधान निर्माणपछि औद्योगिक क्रान्तिको सपना देखेका उद्यमी व्यवसायीहरु राजनीतिक दलका कार्यकर्ताबाट हुने गरेका उद्योगधन्दा तोडफोड र बन्दले बैंकको ब्याज तिर्नै नसक्ने अवस्थामा पुगेको गुनासो पोख्नुभयो ।
लामो समयको मधेस बन्दले त्यहाँ बस्ने सर्वसाधारण जनता र मजदुरहरुले समेत ठूलो पीडा भोग्नुपरेको बताउँदै उहाँले औद्योगिक क्षेत्रको विकास नभएसम्म देश विकास असम्भव भएकाले यस्ता बन्द हडताल सधैँका लागि बन्द गर्न आग्रह गर्नुभयो ।
सो अवसरमा अध्यक्ष मुरारकाले पोखरा उद्योग वाणिज्य सङ्घबाट प्रदान गरिने यस वर्षको आर्थिक पत्रकारिता पुरस्कार पत्रकार सन्तोष पोखरेललाई हस्तान्तरण गर्नुभयो । दुई, दुई वर्षमा वितरण गरिने सो पुरस्कारको राशि रु २५ हजार र सम्मानपत्र रहेको छ ।
यस्तै लक्ष्मी हाउसबाट सञ्चालित लक्ष्मी विद्या पदकबाट पृथ्वीनारायण क्याम्पसमा व्यवस्थापन सङ्कायको स्नातक तहका छात्र सुरेन्द्र नेपाल र पोखरा कलेज अफ म्यानेजमेन्टका छात्रा सुमना बज्राचार्य पुरस्कृत भएका छन् ।
त्यस्तै वस्तुगत सङ्घको तर्फबाट पोखरा हार्डवयर्स एसोसिएसनलाई सम्मान गरिएको थियो ।
सङ्घका अध्यक्ष विन्दुकुमार थापाको अध्यक्षतामा भएको उक्त समारोहमा प्रेमप्रसाद पौडेल, ध्रुवबहादुर थापा, लक्ष्मी त्रिपाठीलगायतका वक्ताहरुले मन्तव्य व्यक्त गर्नुभएको थियो ।
