नेपालका लागि भारतीय राजदूत रञ्जित रे
काठमाडौँ, १३ असोज । नेपालका लागि भारतका राजदूत रणजित रायले नेपालमा हाल उत्पन्न समस्या चाँडो समाधान हुने विश्वास व्यक्त गर्दै दुई देशबीचको सम्बन्ध पुरानै अवस्थामा फर्कनेमा आफू ढुक्क रहेको बताएका छन् ।
भारतीय दूतावासमा आज पत्रकार सम्मेलन गरेर उनले दुई मुलुकबीचको अहिलेको असमझदारी शीघ्र अन्त्य हुनेमा आफू आशावादी रहेको बताए ।
“अहिलेको समस्या नेपालको आन्तरिक विषय हो र त्यसको समाधानका लागि यहाँको नेतृत्व वर्ग लागिपरेको छ,” राजनीतिक समस्याको निकास खोज्न सम्बद्ध दलका नेता क्रियाशील रहेकाले शीघ्र निकास निष्कने विश्वास व्यक्त गर्दै उनले भने ।
“बल प्रयोग गरेर तत्कालै समस्या समाधान भए पनि त्यो चिरस्थायी हुँदैन”, सीमापारिबाट भइरहेका अवाञ्छित गतिविधि नियन्त्रण गर्न आफ्नो मुलुकका सुरक्षाकर्मी प्रयोग गर्न नसकिने स्पष्ट गर्दै उनले बताए ।
खुला सिमानाका कारण भारतीय भूमिमा नेपाली पुग्ने गरेका र ‘रोटीबेटीको’ द्विपक्षीय सम्बन्धमा सुरक्षाकर्मी परिचालन गर्न नसकिने उहाँको तर्क थियो । भारतले नेपाल र नेपालीलाई आदर गर्दै आएको र नेपालका सबै नेता भारतका मित्र भएका पनि बताए ।
वार्ताको माध्यमबाट समस्याको निकास खोजिनुपर्नेमा जोड दिँदै उनले आन्दोलनरत पक्ष र सरकार मिलेर अघि बढ्नु श्रेयस्कर हुने बताए । दुवै देशका सरकार र जनताका साथै कूटनीतिक तहमा पनि आपसी सम्बन्धलाई पुरानै अवस्थामा फर्काउने अथक प्रयास भइरहेको राजदूत रायले बताए । उनले भने– “भारतको झण्डा र पुतला जलाएर समस्या समाधान हुन्छजस्तो मलाई लाग्दैन ।”
