रसियाले पूर्वी युक्रेनमा अन्तर्राष्ट्रिय सहयोग बन्द गराउन विद्रोहीलाई उक्सायो ः राष्ट्रसङ्घ

मस्को (रसिया), ८ असोज । संयुक्त राष्ट्रसङ्घ शरणार्थीसम्बन्धी संस्था (यूएनएचसीआर) ले पूर्वी युक्रेनमा अन्तर्राष्ट्रिय सहयोगको बाटो बन्द गर्न दबाब दिन रसियाद्वारा मस्को पक्षधर युक्रेनी विद्रोहीलाई उक्साएको दाबी गरेको छ ।

तर, विद्रोहीले भने सहयोगमा प्रतिबन्ध लगाउनुपर्ने आफ्नो धारणा पूर्वी युक्रेनमा कानुनी मूल्य र मान्यताको स्थापना गराउने प्रयासस्वरुप गरिएको बताएका छन् ।

युक्रेनमा सरकार र रसिया पक्षधर विद्रोहीबीच सुरु भएको युद्धका कारण अहिलेसम्म ८ हजार व्यक्तिको मृत्यु भएको छ । त्यस्तै २० लाख मानिस युद्धका कारण विस्थापित हुन पुगेको राष्ट्रसङ्घको आँकडा छ ।

संयुक्त राष्ट्रसङ्घका अनुसार, युक्रेनी सरकारले विद्रोही नियन्त्रित इलाकामा सबै सार्वजनिक सेवामाथि प्रतिबन्ध लगाएसँगै यहाँका बासिन्दालाई अन्तर्राष्ट्रिय समुदायको उपस्थिति अति आवश्यक छ ।

यूएनएचसीआरले शुक्रबार लुहान्स्कस्थित विद्रोही नेता देनिस पुसिलिनले बुधबार यूएनएचसीआर तथा अन्य अन्तर्राष्ट्रिय समुदायको उपस्थितिमा प्रतिबन्ध लगाएको बताएको छ । संयुक्त राष्ट्रसङ्घले यो निर्णयमा पुनःविचार गरिनुपर्ने बताएको छ ।

विद्रोहीहरु विदेशी समुदायले पुरयाइरहेको सहयोग आफ्नो विरोधमा ल्याइएको भन्दै यसप्रति सधैँ सशङ्कित रहँदै आएको छ ।