बुडापेष्ट, ७ असोज । बुधबारमात्र हङ्गेरीमा १० हजार जनाभन्दा बढी आप्रवासी प्रवेश गरेका छन् । यसलाई हङ्गेरीको इतिहासमा नै सबैभन्दा धेरै आप्रवासीको प्रवेश भनी टिप्पणी गरिएको छ ।
क्रोएसिया भएर ती आप्रवासी हङ्गेरी प्रवेश गरेका यहाँका सरकारी निकायले जानकारी दिएका छन् । बिहीबार हङ्गेरियन प्रहरीले यस विषयमा जानकारी दिएको हो ।
हङ्गेरीको प्रहरीले उत्तरी युरोपबाट बाल्कान हँुदै यसरी आप्रवासीहरु प्रवेश गर्ने गरेको समाचारमा जनाइएको छ ।
बुधबार हङ्गेरी प्रवेश गरेकामध्ये करिब नौ हजार ९३९ जना क्रोएसियाबाट र अरु १०२ जना सर्वियाबाट प्रवेश गरेका हङ्गेरियन अधिकारीहरुले बिहीबार जानकारी दिएका छन् ।
यसअघि सेप्टेम्बर १४ मा हङ्गेरीमा नौ हजार ३८० जना आप्रवासी प्रवेश गरेका थिए । त्यसपछि बुधबार नै यहाको इतिहासमा सबैभन्दा धेरै आप्रवासी आएका हुन् ।
पछिल्लो समयमा युरोपमा आप्रवासीहरुको प्रवेश एक प्रमुख चुनौतीका रुपमा देखिएको छ । सोही कारण पनि शरणार्थीसम्बन्धी नीतिमा युरोपले पुनरावलोकन गर्ने पनि बताउँदै आएको छ ।
फ्रान्सले थप शरणार्थी लिने
यसैबीच एक अर्को समाचारअनुसार फ्रान्सले थप शरणार्थी लिने कुरा सार्वजनिक गरेको छ । तर त्यस समाचारमा उसले लिने भनेका नयाँ थप शरणार्थीको सङ्ख्याका बारेमा भने केही पनि बताइएको छैन ।
फ्रान्सले यसअघि गत महिनामात्र पनि कम्तीमा पनि २४ हजार जना शरणार्थी लिने जनाएको थियो । आफ्नो देशमा त्यति शरणार्थीको आवेदन लिने र उनीहरुलाई शरण दिने उसले जनाएको हो ।
पछिल्लो समयमा युरोपेली देशहरुमा शरण माग्नेहरुको भीडभाड बढ्न थालेको छ । जसका कारण कैयौँ देशले यसबारेमा आआफ्नो नीति अख्तियार गर्नुपर्ने भएको छ ।
यही पृष्ठभूमिमा फ्रान्सले पनि सो बारेको नीतिक घोषणा गरेको समाचारमा जनाइएको छ ।
