भोजपुर प्रतिभा पुरस्कार मिरा राई र सम्मान मन्जुललाई
मीरा राइ
लण्डन । खेलाडी तथा अल्ट्रा रन च्याम्पियन मिरा राईलाइ यो वर्ष ‘भोजपुर प्रतिभा पुरस्कार’र वरिष्ठ कवि मन्जुललाइ ‘भोजपुर प्रतिभा सम्मान’ प्रदान गरिने भएको छ ।
भोजपुर प्रतिभा प्रतिष्ठान, बेलायतका अध्यक्ष दयाकृष्ण राईको अध्यक्षतामा हालै बेलायतमा बसेको बैठकले उक्त निर्णय गरेको हो ।
खेलाडी तथा धावक मिरा राईले छोटो समयमै अल्ट्रा रनमा नेपालमा मात्र नभई विस्वमै नेपालको शिर उच्च हुने गरी प्राप्त गरेको सफलता र उनको खेलकुदप्रतिको योगदानको कदर गर्दै उनलाई थप हौसला प्रदान गर्न यो पुरस्कार दिने निर्णय गरिएको कुरा प्रतिष्ठानका सचिव तथा कवि काङ्गमाङ नरेश राईले जानकारी दिए । त्यस्तै गरि नेपाली भाषा, साहित्यको क्षेत्रमा दिएको उल्लेखनीय योगदानको कदर गर्दै वरिष्ठ कवि मञ्जुललाई उक्त सम्मान प्रदान गरिने भएको छ ।
भोजपुरको सानो दुङमामा जन्मिएकी मिरा राईले हङकङ, अष्ट्रेलिया, फ्रान्स, नर्बे, स्विट्जरल्याण्ड, ईटाली लगायतका देशहरु अल्ट्रा दौडमा भाग लिई सकेकी छिन्।उनले भर्खरै बार्सिलोना बागामा सम्पन्न अल्ट्रा पिरिनेउ म्याराथनमा महिलातर्फ विश्व उपविजेता बनेकी छिन् । हिमालयन, मुस्ताङ र मनास्लु, इटाली र हङकङमा भएका अल्ट्रा दौडमा ६ पटक विजेता बनेकी राईले अन्तर्राष्ट्रिय स्तरमा सहभागिता जनाएका १४ वटा अल्ट्रा दौडमध्ये आठ वटामा उपाधि चुमेकी छिन्।उनले यसअघि फ्रान्समा भएको ८२ किलोमिटरको मोन्ट ब्लङ्क म्याराथनको उपाधि जित्दै नेपालको शान विश्वभर फैलाएकी थिइन् । अल्ट्रा दौड शुरु गरेको २ वर्षमा नै चर्चा कमाएकी राईले अन्तर्राष्ट्रिय प्रतियोगितामा भाग लिन थालेको एक वर्षमा नै यति ठूलो सफलता हात पारेकी हुन्।
मन्जुल
त्यस्तैगरी वरिष्ठ कवि मञ्जुल अर्थात मेघराज शर्मा नेपालले लामो समयदेखि नेपाली भाषा, साहित्यमा दिनुभएको योगदानको उच्च कदर गर्दै ‘भोजपुर प्रतिभा सम्मान’ प्रदान गर्ने निर्णय गरेको छ । कवि मञ्जुल साहित्यकार तथा गायक हुन्। उनलाई साहित्यिक नाम ‘मञ्जुल’ अथवा ‘मञ्जुल राल्फा’ का उपनामले चिनिन्छ। उनको नेपाली साहित्यको कविता तथा निबन्ध विधामा उल्लेखनिय योगदान छ। राल्फा आन्दोलनबाट नेपालको राजनीतिक, साहित्यिक र सांगीतिक क्षेत्रमा प्रवेश गरेका मञ्जुल पछि गएर साहित्यिक लेखन नै मुख्य क्षेत्र बन्यो। भाषा साहित्यको क्षेत्रको उल्लेखनीय योगदान पुर्याउँदै आउनु भएको छ।
सन् २००८ मा स्थापन भएको भोजपुर प्रतिभा प्रतिष्ठान, बेलायतले साहित्य, सङ्गीत तथा खेलकुद विधामा योगदान दिएका भोजपुरे व्यक्तित्वहरुलाई पुरस्कृत र सम्मानित गर्दै आएको छ । यसअघि साहित्यकार पूर्णप्रकाश नेपाल ‘यात्री’,साहित्यकार परशु प्रधान, साहित्यकार कृष्ण जोशी, साहित्यकार जिबी लुगुन,वरिष्ठ कवि शैलेन्द्र साकार सम्मानित भैसकेका छन् भने कवि श्रवण मुकारुङ, गायक तथा संगीतकार दिनेश बान्तवा, कवि विप्लव ढकाल र कवि विमल गिरीलाई पुरस्कृत भैसकेका छन् ।
‘भोजपुर प्रतिभा सम्मान’ दोसल्ला र ताम्रपत्रसहित १० हजार रुपैयाँ नगद थैली रहेको छ भने पुरस्कारतर्फ ताम्रपत्रसहित रु. ३५ हजार रुपैयाँ राशी रहेको छ । सम्मान तथा पुरस्कार आगामी केही महिना पछि काठमाडौँमा एक भब्य समारोहको बिच प्रदान गरिने कुरा प्रतिष्ठानले जनाएको छ ।
