लण्डन । संविधानसभाबाट नयां संविधान जारी भएको खुशीयालीमा युकेको रेडिंगमा बसोबासरत नेपालीहरुले दीपावली गरेका छन् ।
नेपालमा राष्ट्रपति रामवरण यादवबाट संविधान जारी हुंदै गर्दा रेडिंगका नेपालीहरु भने हर्ष बढाइं गर्न कम्बरल्याण्ड रोडस्थित वेयरहाउसमा जम्मा भएका थिए ।
हाइली स्किल्ड माइग्रेन्ट फोरम रेडिंगको आयोजनामा भएको सो कार्यक्रममा वक्ताहरुले गैरआवासीय नेपालीहरुलाई नागरिकताको निरन्तरताको प्रावधान राखिदिएकोमा स्वागत गरेका थिए ।
पूर्व न्यायाधीश नवराज उपाध्याय, अधिवक्ता प्रेम गुरुंगले नयां संविधान भारत र अमेरिकाको संविधानको दांजोमा बढी प्रजातान्त्रिक, समावेशी र लचिलो भएको बताएका थिए ।
फोरमका अध्यक्ष नविन आचार्यले संविधानका बारेमा बोलेका थिए भने कृष्ण न्यौपाने र प्रतिमा केसीले कविता वाचन गरेका थिए । कार्यक्रमको संचालन रमेश कायस्थले गरेका थिए ।
