लण्डन । नेपालमा संविधानसभामार्फत राष्ट्रपति डा. रामवरण यादवले नयां संविधानको घोषणा गर्दै गर्दा लण्डनको मुटु ट्राफलगर स्क्वाएरमा भने एक समूहले संविधान च्यात्दै जलाउंदै थियो ।
नयां संविधानमा पहिचानको पांच र सामर्थ्यकाे चार आधारमा राज्यको पुनसंरचना नभएको, आदिवासी जनजातिको बाहुल्यता र पहिचान गाँसिएका क्षेत्रहरुलाई भूमाफियाले जस्तो गरी क्लष्टर छुट्याएर भाग लगाइएको आरोप लगाउंदै संविधान जलाइएको संघीय समाजवादी फोरमका केन्द्रीय सदस्य भगवान चाम्लिंगले बताए ।
भूपू गोरखाका सन्तानहरुलाई दोहोरो नागरिकताको व्यवस्था संविधानमा नगरिएको, धर्म निरपेक्षताको गलत व्याख्या गरिएकोले संविधान च्यात्नु परेकाे चाम्लिंगले थपे ।
कार्यक्रमको आयोजना फोरमको युकेस्थित भातृ संस्था संघीय समाज युके, नेपाल आदिवासी जनजाति महासंघ युके र राष्ट्रिय जनमुक्ति पार्टीको भातृ संगठन हिमालयन अर्गनाइजेसनले संयुक्त रुपमा गरेका थिए ।
