लन्डन । अन्तर्राष्ट्रिय वाङ्मय प्रतिष्ठान, बेलायतले वैरागी काईंलासहित वरिष्ठ नेपाली साहित्यकारहरुसंग लन्डनमा अन्तरक्रिया गर्ने भएको छ ।

प्रतिष्ठानले अक्टोबर ११ का दिन लन्डनस्थित ब्लु अर्किड रेष्टुरेन्टमा ‘डायष्पोरामा आयामेली सन्दर्भ, आख्यानको विमर्श तथा साहित्य र पत्रकारिताको अन्तर सम्बन्ध’ विषयक अन्तरक्रिया गर्न लागेको हो ।

उक्त साहित्यिक कार्यक्रम बैरागी काईंलाका साथै साहित्यकार एवं पूर्वमन्त्री बलदेव मजगैंया, साहित्यकार राजन मुकारुङ, साहित्यकार वियोगी बुढाथोकी, साहित्यकार तथा पत्रकार राजकुमार दिक्पालको विशेष आतिथ्यमा हुने प्रतिष्ठानकी महासचिव जयालक्ष्मी राईले बताइन् ।

नेपाली साहित्यमा ‘आयामेली आन्दोलन’ (२०२०) इन्द्रबहादुर राई, ईश्वर बल्लभ र बैरागी काईंलाबाट प्रारम्भ भएको थियो । आयामेली आन्दोलनले पारम्परिक सिर्जनालाई चेप्टो साहित्य भन्दै विषयवस्तु, शिल्प–संरचना र भाषाशैलीमा नयांपन खोजेको पाइन्छ ।

दार्जिलिङबाट शुरु भएको यो आन्दोलन नेपाली साहित्यमा धेरै प्रभाव छ ।
वैरागी काईंला आयामेली आन्दोलन मार्फत साहित्य क्षेत्रमा नयां युगको शुरुवात 
गर्ने साहित्यकारको रूपमा चिनिन्छन् । उनी थोरै कविता लेखेर धेरै चर्चित प्राज्ञमा समेत दरिन्छन् ।