पशुपति मन्दिर लन्डनको तीज उत्सव उल्लासमय

लन्डन । साउथ ईस्ट लन्डनको पशुपतिनाथ मन्दिरको आयोजनामा नेपाली महिलाहरुको बिशेष पर्व तीज भब्य रुपमा सम्पन्न भएको छ । एसियन कम्युनिटी हल प्लमस्टीडमा सम्पन्न तीज कार्यक्रममा प्रतिकुल मौसमको बावजुत पनि स्थानीय महिलाहरु उल्लासमय रुपमा सहभागी भए । रातै साडीमा सजिएका महिलाहरु समूहगत नाच गानमा रमाएका थिए ।
मन्दिरको पूजा कक्षको प्रस्तिस्थापन सहित पण्डित निलहरी घिमिरे तथा बिनोद पन्थीले सचालन गरेको तीज बिशेष पूजामा महिलाहरु भक्तिपूर्वक आराधना गरेका थिए । सामूहिक आरति तथा बिसर्जन पूर्व तीज पर्वको महिमा माथि प्रवचन गरिएको थियो ।

मन्दिर समितिका अध्यक्ष बालजंग आर्यालले महिला विशेष पर्वको लागी मन्दिरले कार्यक्रम आयोजना गर्न पाउनु खुशीको कुरा रहेको बताए । कार्यक्रममा करिब सात सय महिला सहभागी भएको जानकारी कार्यक्रम संयोजक सहदेब गिरीले दिएका छन् । कार्यक्रमको लागी मन्दिर समितिका पदाधिकारी तथा ट्रस्टिहरु लगायत पुरुषहरु व्यवस्थापनमा सक्रिय देखिन्थे ।
यसैगरी तीज पर्व संगै जोडिएको महिलाहरुले बस्ने पंचमी ब्रतको अवसरमा समेत मन्दिरमा बिशेष पूजाआजा आयोजना गरिएको जानकारी आयोजक मध्येकै सरिता पौडेलले दिएकी छन् ।