लन्डन । बेलायतले नेपालको संविधानसभामा जारी संविधान निर्माण प्रक्रियाको समर्थन गरेको छ । भारत र अमेरिकाको स्वागत तथा समर्थनपछि बेलायतले नयाँ संविधान जारी प्रक्रियालाई आफूले नजिकबाट नियालिरहेको भन्दै समर्थन ब्यक्त गरेको हो । संविधान जारीको अन्तिम चरणको प्रक्रियालाई हेरिरहेको पनि बेलायत सरकारले उल्लेख गरेको छ ।
‘नयाँ संविधान समावेशी, समानता, अधिकतम सहमति र मानव अधिकारका लागि अन्तर्राष्ट्रिय स्तरको हुनेमा हामी विश्वस्त छौ । यो दिगो शान्ति र विकासको जग निर्धारण गर्नेतर्फ उन्मुख हुनेछ ,’ एसिया हेर्ने बेलायती विदेश राज्यमन्त्री ह्युगो स्वायरलाई उधृत गर्दै बिज्ञप्तिमा जनाइएको छ । विनाशकारी भूकम्पपछिको पुनःनिर्माणमा अघि बढेको मुलुक नेपालले दिगो शान्ति र विकासलाई संगै लैजाने विश्वास बेलायतले व्यक्त गरेको छ ।
बेलायतले नेपालमा देखिएका समस्या सार्थक वार्ताका माध्यमबाट समाधान गर्नसमेत अग्रह गरेको छ । शान्तिपूर्ण, गैरहिंस्रक माध्यमबाट अघि बढ्न राज्य र आन्दोलनरत पक्षलाई बेलायतले आग्रह गरेको छ । नेपाल र बेलायतबीच कूटनीतिक सम्वन्ध स्थापनाको दुईसय बर्ष गाँठ मनाइरहंदा बेलायत नेपालको विकास प्रक्रियामा सहयोग गर्ने प्रमुख दातृ मुलुक पनि हो ।
