लन्डन । ब्रिटिश मल्टिनेशनल कफी हाउस कम्पनी ‘कोस्टा’ को हिथ्रो विमानस्थल टर्मिनल टु आउटलेटमा काम गर्ने एकजना नेपाली प्रतिक श्रेष्ठ ‘बरिस्ता अफ दि इयर’ भएका छन् । २० वर्षीय श्रेष्ठले लन्डन क्षेत्रबाट उक्त उपाधि जितेका हुन् । गत वर्षदेखिमात्र कोस्टामा काम गर्न थालेका श्रेष्ठले विभिन्न भेराइटीका कफी मात्र होइन, आफ्नै बेग्लै पेय पदार्थ बनाउने सिपले उक्त सफलता हात पारेका हुन् ।
चकलेट, क्यारामेल र भुटेको हेजल नट (सुपारी) को समिश्रणबाट उनले बनाउने पेय पदार्थले ग्राहक मन जितेको हो ।

श्रेष्ठले कफीले आफ्नो जीवनमै परिवर्तन ल्याइदिएकामा दंग छन् । उनले यो सफलताले प्रगतिका अरु ढोका खोलिदिएको अनुभूति समेत गरेका छन् । आगामी २० जनवरी, २०१६ मा टोब्याको डक लन्डनमा हुने च्याम्पियनसीप फाइनलमा कम्पनीको अन्तर्राष्ट्रिय अवार्ड जित्ने विश्वास समेत उनको छ ।

कोस्टा स्टारबक्सपछि विश्वकै दोश्रो ठूलो अन्तर्राष्ट्रिय कफी चेन हो । गत मे २०१४ सम्म बेलायतमा यसका एकहजार ७ सय ५५ आउटलेट, ३५ सय कोस्टा एक्सप्रेस भेन्डिङ सेवा र विश्वका ३० मुलुकमा एघार सय ६ वटा स्टोर छन् ।