लन्डन । तमु समाज यूके आमा समूहले गत शनिवार ८ औं लेडिज् नाइट एवं तीज कार्यक्रम गरेको छ । ह्यारो बरो फुटबल क्लव हलमा कार्यक्रम भएको हो । कार्यक्रममा तमु समाज यूके उपाध्यक्ष बिजु गुरुङ, आमा समूह अध्यक्ष माया गुरुङ र समूहकी उपाध्यक्ष पुष्पा गुरुङले पानसमा बत्ती बालेर कार्यक्रम उद्घाटन गरिएको थियो । आमा समूह अध्यक्ष माया गुरुङको अध्यक्षतामा भएको तीज कार्यक्रममा अध्यक्ष गुरुङले स्वागत मन्तव्य दिएसंगै कार्यक्रम अघि बढेको थियो ।
समाजले सन् २००८ देखि महिलाहरुका लागि तीजमा यस्तो कार्यक्रम गर्दै आएको छ ।
बिहान दश बजेदेखि शुरु कार्यक्रममा खाना संयोजन हरिमान गुरुङको नेतृत्वमा ज्ञान, महेश घले, काजी र वुद्धि गुरुङबाट भएको थियो । सहभागी दिदीबहिनीले घरैबाट सेलरोटी ल्याएका थिए ।
लेडिज नाइट एवं तीज कार्यक्रममा समूहले सधैं झैं यो पटक पनि ७० वर्ष नाघेका वृद्धाहरुलाई निशुल्क खानपिनसहित खादाले सम्मान गर्दै अतिथी ग्रहण गराइएको थियो ।
कार्यक्रम उद्घोषण सइन्द्र केसी, फोटोग्राफी यम गुरुङ र भिडियो कुमार गुरुङले गरेका थिए । उक्त अवसरमा सहभागीमध्ये सबैभन्दा उत्कृष्ट र लामो समयसम्म नृत्य गर्ने महिलालाई विजेता घोषित गरिएको थियो जसमा संगिता खत्री प्रथम, द्धितिय शिव गुरुङ र तृतीय कृपा गुरुङ क्राउन र नटराजको मोतीबाट सम्मानित भए ।
उपाध्यक्ष बिजु गुरुङबाट राफलका विजेतालाई पुरस्कार वितरण भएको थियो । सइन्द्र केसी, विन्दु घले, विमला गुरुङ, मिरा गुरुङको सक्रिय योगदान रहेको उक्त पार्टीमा आमा समूहकी उपाध्यक्ष पुष्पा गुरुङले अतिथीहरु, समाजका अध्यक्ष अर्जुनकुमार गुरुङ र कार्यसमिति एवं सहयोगी सबैप्रति आभार व्यक्त गरेकी थिइन् ।
