लन्डन । यतिखेर लन्डनका विभिन्न गन्तव्यमा गुड्ने रातो बसहरुमा सर्वत्र छाएको छ एभरेष्ट । ठूला ठूला होर्डिङ बोर्डले पनि ‘एभरेष्ट’ कै विज्ञापन गरिरहेका छन् । लाग्छ, भूकम्पपछि शिथिल पर्यटन प्रवद्र्धनमा नेपाल सरकारको आंखा खुलेछ । तर, त्यसो होइन । विश्वकै सर्वोच्च शिखर सगरमाथा (एभरेष्ट) को त्यो प्रचार प्रसार त आगामी शुक्रवार (सेप्टेम्बर १८) बेलायतमा सार्वजनिक हुन लागेको हलिउड फिल्म ‘एभरेष्ट’ को पब्लिसिटी काइदा हो ।
सन् १९९६, मे १० र ११ तारिख सगरमाथा चढ्न लाग्दा आठ जना आरोहीको ज्यान जाने गरि भएको दुःखद घट्नाले विश्वभर ध्यान आकृष्ट गरेको थियो । त्यही सत्य घट्नामा केन्द्रित दुई घण्टा लामो उक्त अमेरिकी थ्री डि फिल्म निर्माण पक्षले विज्ञापनका लागि लन्डनका रातो बस रोजेको हो ।
लन्डनमा टिएफएल (ट्रान्सपोर्ट फर लन्डन) बस नेटवर्कमा गरिएको विज्ञापनलाई प्रभावकारी मानिन्छ । यत्रतत्र गुडिरहेको बसमा यात्रु र अन्य सबैको आंखा पर्ने हुनाले यो प्रभावकारी मानिएको हो । टिएफएलका अनुसार, लन्डनमा ७ हजार ५ सय राता बसले एकैदिन ६० लाख भन्दा बढि यात्रु ओसार्छन् ।
सो थ्रिलर फिल्मका निर्देशक हुन् बल्तसार कोर्माकुर । कथा भने विलियम निकोल्सन् र साइमन ब्यूफोले लेखेका हुन् ।
करिब ६५ मिलियन डलरको लागतमा बनेको उक्त फिल्ममा जेसन क्लार्क, जोस ब्रोलिन, जोन हकेस्, रोविन राइट, माइकल केली, साम वर्दीङ्टन, केइरा नाइट्ली, इमिली वाट्सन र जेक गेलेनहालको अभिनय छ । त्यतिखेर पर्वतारोहण दलका दुई नेतृत्वकर्ता स्कट फिस्चेर र रोव हलसहित ज्यान गुमाएका आरोहीको नालीबेलीमा केन्द्रित छ फिल्म । फिल्मले सगरमाथा आरोहणका अप्ठ्यारा पाटा छर्लंग पारेको छ ।
उक्त फिल्म छायांकनका लागि ४४ जनाको समूह गत वर्ष नेपाल गएको थियो । निर्माण पक्षले सन् २०१४, जनवरी ९ देखि २३ सम्म अनुमति लिएर लुक्ला विमानस्थल, नाम्चे बजार, एभरेष्ट बेस क्याम्पमा छायांकन गरेको थियो । फिल्मका केही दृश्य इट्ली र यूकेमा समेत खिचिएको छ ।
यूनिभर्सल पिक्चरले ‘एभरेष्ट’ अमेरिका र क्यानडामा २५ सेप्टेम्बरका दिन रिलिज हुने जनाएको छ ।
भिडियो लिंक
