अन्तिम सहमति हुंदै गर्दा एकत्रित उम्मेदवार अनि अन्य पदाधिकारी
लन्डन । एनआरएनए यूकेको महत्वपूर्ण पद र प्रतिष्ठा, त्यस माथि बेलायतमा हुने दैनिक जसो कार्यक्रममा अतिथी आसन । सबैलाई लोभ्याएकै छ यसले । त्यहि लोभले गतसाता विधि विधान र नियमलाई ‘लत्याउदै’ एनआरएनए यूकेमा सहमतिमै भागवण्डा भयो । अचम्म त निर्वाचन समितिमा उम्मेदवारी दर्ता नगरेको मात्रै होइन, एनआरएनए यूकेको सदस्यता दरखास्तमा समेत रित नपुगेर अस्वीकृत व्यक्तिलाई महत्वपूर्ण पद सुम्पेर भागवण्डा गरियो ।
एकातिर उम्मेदवारी नहालेका कतिपय सदस्यहरु आर्शीवाद वा कसैको निगाहमै महत्वपूर्ण पद पाउन पुगे भने अर्कोतर्फ उपाध्यक्ष जस्तो पदमा उम्मेदवारी दिएका व्यक्ति सहकोषाध्यक्ष हुन तयार भए सहमतिको नाममा । यसलाई हेर्दा सहमतिको नाम दिइएको ‘भागवण्डा’ मा जातीय स्वार्थ, गोर्खा पल्टनका नम्बरी, कतै न कतैबाट जोडिने नातेदार, निर्वाचन हुन्न कि भन्ने त्रास, आफूले निर्वाचन हार्ने मनोविज्ञान र सबैले पद पाउने भएपछि तैं चुप मै चुपको अवस्थाले काम गरेको देखिन्छ ।
यो कामका लागि पर्दामा रहेर पूर्व अध्यक्षहरु डमर घले, सूर्य गुरुङ र पर्दा पछाडिबाट योगेन क्षेत्रीलगायतको खेल देखिन्छ । खासगरी
पूर्व अध्यक्ष मेजर रि. डमर घलेले हारको नजिक रहेका अध्यक्षका उम्मेदवार योगकुमार फगामीलाई उपाध्यक्षमै, रित नपुगेर सदस्यता समेत अस्वीकृत भएका राष्ट्र राई पनि उपाध्यक्षमै र निर्वाचन समितिमा उम्मेदवारी मनोनयन नै नगरेका रिचार्ड गुरुङलाई युवा सहसंयोजकमा ल्याउन सफल भए । यो मिलिभगतलाई गहिरिएर हेर्ने हो भने घले, पूर्व अध्यक्ष योगेन क्षेत्री र उपाध्यक्ष राईबीच ‘भित्री सम्बन्ध’ रहेको उजागर हुन्छ । तीनजना जहां भएपनि एकअर्कालाई पर्दा सहयोगी बनेको विगतमा देखिएकै हो । अर्को पाटोलाई हेर्ने हो भने अध्यक्ष गुरुङका ब्याजी पनि हुन् राष्ट्र राई । फगामीले मेहनत गरेर बनाएका आफ्ना साधारण सदस्यहरुको सदस्यता रित नपुगेको भन्दै निर्वाचन समितिले अस्वीकृत गरेपछि निर्वाचन हार्ने निश्चित प्राय थियो । प्रक्रियामै प्रवेश नगरि ‘आउट’ भएका उपाध्यक्ष राई र उम्मेदवारी नै दर्ता नगरेका युवा सहसंयोजक गुरुङलाई एनआरएनए यूके कार्यसमिति भित्र पर्छु भन्ने कल्पना समेत थिएन । तीनै जनाका लागि पूर्व अध्यक्ष घले ‘भगवान’ सावित भएर आए । एनआरएनए यूके सल्लाहकार समेत रहेका राई विगतमा पूर्व अध्यक्ष क्षेत्रीको पक्षमा खुलेरै लागेका थिए । त्यसैको ब्याज स्वरुप
राईले ‘उपहार’ सरह उपाध्यक्ष पद पाएका छन् भने एनआरएनए यूके अध्यक्ष महेन्द्र कंडेलको विपक्षमा र क्षेत्रीको साथमा उभिए वापत फगामी ‘सर्वनाक हार’ बाट जोगिन सफल भए ।
सहमतिकै पक्षमा उभिएका अध्यक्षका प्रत्यासी हिराधन राई उपाध्यक्षमा चित्त बुझाउन तयार भए । अर्का अध्यक्षका प्रत्यासी विश्वास दीप तिगेला अन्तिम समयमा आइसीसीमै चित्त बुझाए । टिम घोषणा गरेर मैदानमा ओर्लिएका तिगेलालाई उपाध्यक्षमा रहेका फगामी र सचिवमा लक्ष्मी राई (लारा) ले साथ नदिएपछि मैदानमा उनी मात्र देखिएका थिए । मतदाता बिनाको मैदानमा उनलाई पनि सम्झौता गर्न हारको त्रासले साथ दियो ।
प्रवक्ता रहेका अर्जुन कटुवाललाई भने उपमहासचिवको जिम्मेवारीमा पुरयायो भने उपाध्यक्षका प्रत्यासी बुद्धिराम थापालाई सचिवमा । स्रोतका अनुसार अन्तिम समयसम्म उपाध्यक्ष नछाड्ने अडानमा रहेका थापालाई सबै पदमा बाडंफाडं मिलेपछि सचिवमा चित्त बुझाउनु परयो । एनआरएनए यूकेको सदस्यमा राम्रो भूमिका निर्वाह गरेका फणिन्द्र भट्टराईलाई अध्यक्ष गुरुङले यही मौकामा साथ दिए । आफू अध्यक्ष हुंदा प्रवक्ता बनाउने मनसायले गुरुङले एनआरएनए यूकेभित्र छिराएका भट्टराईलाई खुसी लिम्बुले प्रवक्ताको दावी गरेपछि सचिवमा राख्नु परयो । एनआरएनए बुझेका र पत्रकार समेत भएकाले गुरुङले भट्टराईलाई प्रवक्तामा प्रस्ताव गरेका थिए ।
पहिले सचिव लड्ने घोषणा गरेका र अन्तिम समयमा आएर महासचिवमा उम्मेदवारी दर्ता गराएका लिम्बुले प्रवक्ता पद रोजेपछि सहमतिमै ताली गुन्जियो ।
महासचिव पदमै दोहोरयाउन लागेका राजकुमार त्रिपाठीलाई कुनै पनि अध्यक्षले ‘ग्रीन सिग्नल’ नदिएपछि काठमाडांैबाट फर्के लगत्तै त्रिपाठी सहमति भांड्ने प्रयासमा लागे । उपस्थिति पुस्तिकामा हस्ताक्षर गराएर निर्णयमा हस्ताक्षर गरेको भन्दै एनआरएनए यूके कार्यसमितिको आकस्मिक
बैठकमा एजेण्डा प्रस्तुत गरेका अध्यक्ष कंडेलले हप्काउंद्ै बैठक स्थगित गरे । त्यहि रिसमा महासचिव त्रिपाठीले उम्मेदवारी मनोनयनको अघिल्लो दिन निर्वाचन समिति भंग गरेको निर्णय गर्न भ्याए । तर, भोलिपल्ट आफैं निर्वाचन समिति कार्यालय गई उम्मेदवार मनोनयन समेत हेरे । आफैंले गरेको निर्णय कार्यान्वयन नभएपछि मौका खोजिरहेका त्रिपाठीले अध्यक्ष कंडेलले अधिवेशन गर्न निकालेको रकमलाई हिनामिना भन्दै सामाजिक सञ्जालभर फैलाए । त्यसैको परिणाम, निश्चित नभएको आइसीसी कोपमा थन्क्याइएको छ उनलाई । त्रिपाठी मात्र होइन, त्रिपाठीलाई साथ दिने सनत गुरुङ उपाध्यक्षको पद छाडेर च्यारिटी विभाग प्रमुखको पद खान राजी भए । निर्वाचनमा पराजय भोग्नु भन्दा च्यारिटी प्रमुख बन्नु नै आफ्नो हितकर हुने गुरुङको ठम्याइले एनआरएनए यूकेभित्र छिरायो उनलाई ।
आर्थिक पारदर्शीतालाई भरयाङ बनाएर बनाइएको भागबण्डाले आर्थिक मुद्दाको छिनोफानो गर्छ वा पदको मात्र बार्गेनिङ हो, त्यो भने सिंगो कार्यसमितिको काम हेरेपछि थाहा हुने नै छ ।
